بوار، تایبەت
لە ڕاپۆرتێکی هەژێنەر و پڕ لە وردەکاریی مەترسیداردا، ڕۆژنامەی 'نیویۆرک تایمز'ی ئەمریکی پەردە لەسەر تاوانێکی گەورە لادەبات کە لە زیندانەکانی ئیسرائیلدا دژی فەڵەستینییەکان ئەنجام دەدرێت. ڕاپۆرتەکە ئاماژە بەوە دەکات کە دەستدرێژیی سێکسی تەنها ڕووداوێکی تاکەکەسی نییە، بەڵکو گۆڕاوە بۆ شکاندنی کەرامەتی مرۆیی.

دۆسیەیەکی گەورە؛ بەڵگەی سەرسووڕهێنەر
بەپێی بەڵگەنامە و شایەتحاڵەکان کە ڕۆژنامە ئەمریکییەکە پشتی پێ بەستوون، ژمارەی ئەو زیندانیانەی ڕووبەڕووی دەستدرێژیی سێکسی بوونەتەوە بە شێوەیەکی ترسناک ڕووی لە زیادبوون کردووە. ئەم تاوانانە لەلایەن گروپە چەکدارەکان و پاسەوانانی زیندانەکانەوە بە گروپ و بە بەرنامە بۆداڕێژراو ئەنجام دەدرێن.

ئامرازێک بۆ ڕاوکردنی ژنان لە لایەن مۆسادەوە
یەکێک لە شۆککەرترین بەشەکانی ڕاپۆرتەکە، باس لەو فشارە دەروونییە دەکات کە دەخرێتە سەر زیندانیانی مێینە. ڕاپۆرتەکە ئاشکرای دەکات، کە هێزە ئەمنییەکان لە کاتی ئەنجامدانی دەستدرێژییە سێکسییەکاندا، تۆماری ڤیدیۆیی دەگرن.
ئەم ڤیدیۆیانە وەک هەڕەشە بەکاردەهێنرێن؛ بە جۆرێک کە هەڕەشەی بڵاوکردنەوەی ڤیدیۆکانیان لێ دەکرێت لە دوای ئازادبوونیان.

شکاندنی کەرامەت لەژێر پەردەی بێدەنگیدا
پارێزەران و ڕێکخراوەکانی مافی مرۆڤ کە قسەیان بۆ 'نیویۆرک تایمز' کردووە، جەخت دەکەنەوە کە ئەمە پێشێلکارییەکی زەقی پەیماننامە نێودەوڵەتییەکان و مافەکانی مرۆڤە. بەکارهێنانی جەستەی مرۆڤ وەک کەرەستەیەک بۆ فشار و ڕاکێشانی سیخوڕ، ئاستێکی نوێی 'داڕمانی ئەخلاقی و یاسایی' نیشان دەدات کە لە زیندانە نهێنی و گشتییەکانی ئیسرائیلدا پەیڕەو دەکرێت.
ئەم ڕاپۆرتەی نیویۆرک تایمز لە کاتێکدایە کە فشارە نێودەوڵەتییەکان بۆ لێکۆڵینەوە لە بارودۆخی زیندانیانی فەڵەستینی زیادیکردووە، بەڵام دەرکەوتنی بەڵگەی لەم شێوەیە دەربارەی تۆمارکردنی ڤیدیۆیی بۆ مۆساد، دۆسیەکە دەباتە قۆناغێکی زۆر مەترسیدارتر.