بوار، تایبەت
جێگری کاروباری کۆمەڵایەتی و کولتووریی شارەوانیی تاران ڕایدەگەیەنێت، ڕێوڕەسمی بەڕێکردنی تەرمی ڕێبەری کۆماری ئیسلامیی ئێران لە سێ شاری ئەو وڵاتە بەڕێوەدەچێت و بەپێی وەسیەتەکەی خۆی، لە مەزارگەی ئیمام ڕەزا بەخاک دەسپێردرێت.

محەمەد ئەمین تەوەکولی زادە، جێگری کاروباری کۆمەڵایەتی و کولتووریی شارەوانیی تاران ڕایگەیاند: بەڕێوەچوونی ڕێوڕەسمی تەرمی عەلی خامنەیی، ڕێبەری کۆماری ئیسلامیی ئێران لە هەر سێ شاری تاران، قوم و مەشهەد یەکلایی بووەتەوە.

ئاماژەی بەوەشکرد، لە پایتەخت ئامادەکاری دەکەن بۆ پێشوازیکردن لە ئامادەبوونی 15 بۆ 20 ملیۆن کەس لە ڕێوڕەسمەکەدا.

ئەو بەرپرسەی شارەوانیی تاران ڕوونیکردەوە کە بەپێی وەسیەتی خۆی و ڕاسپاردەی کەسە نزیکەکانی، تەرمی خامنەیی لە مەزارگەی ئیمام ڕەزا لە شاری مەشهەد بەخاک دەسپێردرێت.

ئەوەش لەکاتێکدایە کە رۆژی 28ی شوبات عەلی خامنەیی رابەری باڵای ئێران لە هێرشێکی ئاسمانی ئیسرائیل و ئەمریکا بۆ سەر ماڵەکەی لە تاران، لەگەڵ ژمارەیەک فەرماندەی باڵای سەربازی وڵاتیەکەی کوژرا و تائێستا بەخاک نەسپێردراوە