پارتی چاکسازی تورکمان، پشتیوانی خۆی بۆ پەیامەکەی مەکتەبی سیاسی پارتی دیموکراتی کوردستان ڕاگەیاند لەبارەی کاراکردنەوەی پەڕلەمانی کوردستان.

لە بەیاننامەیەکدا پارتی چاکسازی تورکمان ڕایگەیاند: پێشوازی لە دەستپێکردنەوەی دانیشتنەکانی پەرلەمانی کوردستان دەکەن، باوەڕیان وایە کاراکردنەوەی پەرلەمان هەنگاوێکی گرنگ و پێویستە بۆ بەهێزکردنی دامەزراوە دیموکراتییەکان، پاراستنی ڕۆڵی یاسادانان و چاودێریکردنی کارکردنی حکومەت.

لە بەیاننامەکەدا ئاماژە بەوەشدراوە: ئامادەین بە ڕووحی بەرپرسیارێتی و هاوکاری، بەشدارییەکی کارا و بەرهەمدار لە کار و چالاکییەکانی پەرلەماندا بکەین، بۆ ئەوەی ببێتە سەکۆیەکی بەهێز بۆ خزمەتکردنی بەرژەوەندی گشتی، پاراستنی مافەکانی هەموو پێکهاتەکان و پشتگیری لە ئاسایش، ئارامی و گەشەپێدانی هەرێمی کوردستان.