لە بەغدا چى روویدا؟ 
#بوار
درەنگی شەوی ڕابردوو تا بەرەبەیان، پایتەختی عێراق شایەتی هەڵمەتێکی ئەمنی و سەربازیی کتوپڕ و فراوان بوو، لە چوارچێوەی ئۆپەراسیۆنێکی تایبەتدا، هێزە ئەمنییەکان کۆنترۆڵی چەندین ناوچەی بەغدایان کرد و ژمارەیەکی زۆر لە بەرپرسانی باڵای سیاسی و حکومییان بە تۆمەتی تێوەگلان لە دۆسیەکانی گەندەڵی دەستگیرکرد.

بەپێی زانیارییەکان، جووڵەپێکردنی ئەم هێزانە بە فەرمانی ڕاستەوخۆی عەلی زەیدی، سەرۆکوەزیران و فەرماندەی گشتیی هێزە چەکدارەکانی عێراق بووە، بۆ جێبەجێکردنی ئەم ئۆپەراسیۆنە هەستیارە، هەریەک لە هێزەکانی دژەتیرۆر، سوپای عێراق و هێزەکانی بەرپەچدانەوەی خێرا بەشدارییان کردووە و وەک هێزێکی یەکگرتوو هەڵمەتەکانیان بۆ سەر ئامانجە دیاریکراوەکان ئەنجامداوە.

ئامانجی سەرەکیی جووڵەپێکردنی ئەم هێزانە، دەستگیرکردنی ژمارەیەک بەرپرسی باڵای عێراق بووە، کە ناویان لە دۆسیەکانی گەندەڵیدا هاتووە، لە نێو ئەو کەسانەی لە هەڵمەتەکانی شەوی ڕابردوودا دەستگیرکراون، چەندین کەسایەتیی قورس و دیاری گۆڕەپانی سیاسیی عێراق دەبینرێن، لە دیارترینەکانیان:
• موسەنا سامەرایی: سەرۆکی هاوپەیمانیی عەزم.
• عالیە نوسێف: پەرلەمانتاری دیاری پەرلەمانی عێراق.
• تەیف سامی: وەزیری پێشووی دارایی.

سەرچاوە ئاگادارەکان ئاشکرای دەکەن، بازنەی دەستگیرکردنەکان زۆر لەوە فراوانترە، تا ئێستا ژمارەی ئەو بەرپرسانەی کەوتوونەتە دەست هێزە ئەمنییەکان گەیشتووەتە 20 بەرپرس، کە زۆربەیان پێشتر پۆست و بەرپرسیارێتیی باڵا و هەستیاریان لە جومگەکانی بەڕێوەبردنی دەوڵەتدا هەبووە.

ئەمە لە کاتێکدایە، سەرچاوەکان جەخت لەوە دەکەنەوە ئەم ئۆپەراسیۆنە کاتی نییە و کۆتایی نەهاتووە، بەڵکو هەڵمەتەکان بۆ ڕیشەکێشکردنی گەندەڵی بەردەوام دەبن و ناوی چەندین بەرپرسی دیکەش لە لیستەکەدان کە چاوەڕێ دەکرێت لە کاتژمێر و ڕۆژانی داهاتوودا دەستگیر بکرێن و ڕووبەڕووی یاسا بکرێنەوە