نووسینی: ئوسامە جەمیل عەلی.
تایبەت بە بوار
هێدی هێدی گەڕامەوە ناو گوندی و فکرم لەوەی دەکردەوە دەبی ئەو ژن و زەلامە کێبن؟ تەئکید ژن و مێرد نەبوون، بەران کوو لەوێ گەیشتینەوێ و دەبی چەندبی خەریکی ئەو بەزمەی بن، باشە ئەگەر کابرا ئەو ژنەی خۆشدەوێ، لۆ ناچیتە داخوازی، دیارە خۆشی ناوێ و بەس دەستی خۆی پێ گەرم دەکاتەوە، گەیشتمەوە ناو گوندی و دیتم سەلمانە شێت لەوێ نەمایە، ترسەکم لە دری دروستبوو، ئەویش ئەوەبوو؛ ئەگەر کابرا سەلمانی لەوێ دانابی و لە سەلمانی بپرسی کەس بەدوومان دانەهات، ئەوە سەلمان بێ سێ و دوو پێی دەرێ ئەوەی بەدووتان داهات مامەستای مەکتەبێبوو، دەی ئەگەر کابرا دەستی بڕواو بەهێزبی، ڕەنگە بمکوژی، لۆ ئەوەی ئەو نهێنیەی ئاشکرا نەبی، ئەمن لەو خەیارانە دابووم، وەختەکی مام پرینگ بەدەرکەت، هەر لەدووریڕا دەستی لەمن برندکرد، ئەمنیش بەپیری وەچووم و چاکوچۆنیەکی گەرمم لەگەرکرد، گۆتم: کووە هاتیە گوندی؟ گۆتی: وەڵلا لەبەر ئەو کوشتن و بڕین و تازیەی هاتیمە، دوو کوڕە ئامۆزام کوژراینەو هەردووکیش برانە، کێشەکەش ئەوەیە: ئێکیان وەگەڵ قادراغەی کەتبوو، ئەویدیش وەگەڵ نادراغەی، ئەوجە مامەستا وەرە بتانە ئەو هەق و حیسابەی بکەی، دەترسێم ئەو دووە هەر بەخۆ ئێکدیان کووشتبی، گۆتم: وەڵلاهی مام پرینگ زەمانەکی زۆر خراپە تێیکەتینە، وا تێدەگەم ئەو میللەتە پێویستی بە سی ساریدی هەیە، هەتا لە خۆیی و لە وەزعەکەی تێدەگا، مام پرینگ گۆتی: وەڵلا پێویستی بە سێسەت ساڵیە، ئەو میللەتە لە ئەشکەفتێ نووستیەو بەکەس بەخەبەر نایێ، ئاخر کوڕم لۆ کێ خۆ بە کوشتن دەدەی کێ منەتی پێیە! گۆتم: دەوەرە بابچینە کنەمن و چایەکی بخۆینەوە، گۆتی: ناوەڵلا دەچمە ماڵیان و فاتیحەکەی دەخینم، کێشەکە ئەوەیە ئەو دوو برایە هەریەکەی لە ماڵی خۆی تازیەی لۆ داندرایە، دەبی هەر دوو ماڵان بکەم، گۆتم: ئەمن لە مزگەفتێ بەشداریم کردو ئەتووش بڕۆ فاتیحەکەی بخینەو خوا خێرت بنووسی، پێمخۆشە هێوارێ بێیەوە کنەمن، گۆتی: ناوەڵلا لەماڵی ئەو خزمانە دەبم، ئیدی مام پرینگ خواحافیزی کردو ڕۆیی.
وەختی مەغریبێ حەسەنەفەندی هاتەدووم و گۆتی: وەرە بچینە ماڵیمەو نانی هێوارێ پێکەوە بخۆین، گۆتم: دەبی ببوری ئەمن هێواران نانی ناخۆم، گۆتی: دە وەرە سەلامەتبی، نانەکی سووک دەخۆین، ماست و پەنیرو گیزو ئەو شتانەیە، ئیدی لایتەکەی ژۆری خۆم دەست دایێ و هاویشتمە بن پشتێندی و وەگەر حەسەنەفەندی کەتم، دەبانچەکەی بایزیش هەر لەبن پشتێندم بوو، بەران نەمهێشت حەسەنەفەندی ببینی، هێدی هێدی بەسەکەتین لۆ ماری حەسەنەفەندی، وەختەکی دیتم کێشکە لەوسەریڕا دەهات، گەیشتەمەو دەستەکی برندکرد، وەکی برێی ئەوە سەلامبوو کردی، ئەمنیش وەکی وی بە عەستەم دەستم برند کرد، حەسەنەفەندی بە دەنگی برند گۆتی: وەعەلەیکەسەلام، وەلڕەحمە وەلئیکرام، کاکە کێشکە بەخێراتی، غاریدا بە هەردوو دەستان توند دەستی کێشکەی گرت و کووشی و چاك و چۆنی لەگەر کرد و لە ئەحواری ئاغەی پرسی، ئەوجە گۆتی: ئەرێ کێشکە خۆ منداڵەکانی ئاغەی کتێبەکانیان بەدڵی بوو؟ کێشکە سەری لەقاندو تەماشایەکی منی کرد، ئەوجە هاتە تەنیشتەمن و گۆتی: ئەوە وەختی عەسرێ لۆ شۆڕبوویەوە لۆ ناو داروبارەکان و بناری چیایی، چت هەیە لەوێندەر؟ لەگەر ئەو پرسیارەی کێشکەی زانیم سەلمانە شێت شتەکی دەربارەی من درکاندییەو ئەوەی لەگەر ئەو ژنەش بووە، یان کوڕی قادراغەیە، یان ئێکەکی زۆر نێزیکە لە قادراغەی! خۆم تێکنەداو گۆتم: لۆ ئاغە مەنعی کردیە خەرك بچیتە ئەو ڕێیەی؟ گۆتی: چت دیت لەوێ؟ گۆتم: لە غەیری تەیرو تارو داروباری چیدیدی ببینم! گۆتی: ئەتوو تەئکیدی؟ گۆتم: دەرێی تەحقیقم لەگەر دەکەی؟ پشتم لە کێشکەی کردو چوومە نێزیک حەسەنەفەندی و گۆتم بابڕۆین، حەسەنەفەندی گۆتیە کێشکەی: دە توخوا ئەگەر هێوارێ نێی لە خزمەت دابین، پێمخۆشە گەورەم بکەی، کێشکە سەرەکی باداو لێیدا ڕۆیی، گۆتمە حەسەنەفەندی: بە ویزدانت ئەو تڕڕووهاتە ئەوەی دەینی ئەو هەموو ڕێزەی لێبنێی؟ گۆتی: ئەتوو دیارە نازانی ئەوە سەی بەردەرکەی ماڵی ئاغەیە، هەموودەمێ دەڕەوی(دەوەڕی)و کلک بادەدا، وەڵلا بە یەک قسەی وەی ئاغە سەراوبن بەدارێمان وەدەکا، کاکە ئەمن خۆم لەو نەوعە سەیەی دەپارێزم، بەخوا دەرەقەتی کێشکەی نایێم، دوایێ ئاغە بەتەمایە کێشکەی هەم بکاتە موختاری گوندی، هەم سەرۆکی ئەنجومەنی گوندی، دەوجە بینە بەرچاوت ڕدێنی ئەو گوندەی کوو دەکەویتە دەستی کێشکەی! گۆتم: دیارە ئەو گوندە شایانی پیاوی وەکی کێشکەیە، لۆیێ کێشکە دەبیتە دەوڕاستی!
عربي
