حەسەنەفەندی ئەمنی جوداکردەوەو گۆتی: ئەمن خەڵکی ئەو گوندەیمەو باش شارەزای خەڵکەکەیمە، زۆربەی زۆری خزم و کەسوکاری منن، بەگێی برات بکەو واز لە نازەی بینە، ئەتوو بەجارەکی کۆمەڵە دوژمنەکی لۆخۆت پەیدادەکەی، دوژمنی یەکەمت کوڕی قادراغەیەو دوومیشیان ماڵی بابی نازەیە، سێیەمیشیان نادراغەیە، گۆتم: نادراغە لۆ؟ گۆتی: سبەینێ بزانی ئەتوو لەگەڵ نازەی کەینوبەینت هەیە، تەئکید لەڕێی پیاوەکی خۆی زەڕبەکت لێدەداو، لە گوندیش دەیکاتە دەنگودۆڵ و دەڵێ قادراغە مامۆستای کووشت، ئیدی لەوناوەی خینت وەکی ئاوی بارانێ دەڕواو تێبزردەبی، ئەمن ئەتووم خۆشدەوێ و دەزانم کوڕەکی باشی، تکات لێدەکەم ملت لە چەقووی ئەو دوو خینڕێژەی مەخشێنە! ئەو قسانەی حەسەنەفەندی لە درو دەروونی پیاوەکی زۆر ڕاستگۆ دەهاتەدەرێ، کە تەنهاوتەنها بەرژەوەندی منی دەویست، بەینەکی باش بێدەنگبووم، ئەوجە گۆتم: باشە لۆ ماری بابی نازەی دەبنە دوژمنم؟ گۆتی: ئاسان نییە مامۆستایەکی غەوارە(غەریب، نامۆ)بێتە ئەو گوندەیی و حەز لە کیژی وان بکا، سبەینێ لە گوندی دەبیتە قسەو قسەڵۆک و زمانی خەڵکی هەتا خراپە هەبی بە چاکە ناگەڕێ، حەزدەکەم زۆر دڵنیابی ئەمن خۆشمدەوێی و نامەوێ تووشی کێشەو دۆخەیبی، دەستی ڕاستم لەسەر شانی چەپی داناو گۆتم: هەتا دەمرم مەمنونی توومە، بەڕاستی ئەتوو ئێکەکی لەوانەی کەتیە ناو درم و خوای مەزن بتپارێزی.
چوومە کن سەری مام قەتۆیی و دانیشتم و گۆتم: مام قەتۆ ئێستا کووی؟ گۆتی: باشترم کوڕم، مەمنونی خوایمە بەوەندەی بوو، بەس ئەتوو سەرت بینەپێش با دوو قسەت لۆبکەم! سەرم بردەپێش و گۆتم: فەرموو! گۆتی: مامۆستا، وەبیرت دێ کە یەکەم ڕۆژ هاتیە گوندی لە ماڵی من دابەزی؟ گۆتم: بەرێ وەبیرم دێ، گۆتی: ئامۆژگاری چمکردی؟ سەرم برند کردو تەماشایەکی مام قەتۆم کردو گۆتم: تەواو لە قسەکەت گەیشتم، هەقی تووەو داوای لێبوردن دەکەم، گۆتی: فەرقت پێناکەم لەگەڵ بایزی، وەعدی پیاوانبی وەزعەکە هێوربیتەوەو ئەو دوو بەرانە واز لە شەڕەقۆچی بینن، ئەگەر حەزت لێیە نازەی بینی، بەخۆم لۆت بچمە داخوازی، هەر چەند کردم نەمتانی و نەمزانی چ وەرامەکی مام قەتۆی بدەمەوە، لۆیێ بەچاوی پڕ لە فرمێسك لۆ وەزع خراپی ئەو گوندە جوانەی ئەو دووە وا وێرانی دەکەن، نیوچەوانی مام قەتۆم ماچکردو لە بنی درم دوعای شفاو سەلامەتیم لۆکرد!
وەختەکی بووە قیژوهۆڕو هەرا، زانیمان شتەکبووە، ویستمان غاردەینە دەرێ، حەسەنەفەندی گۆتی: شتی وانەکەن، وەڵلا ئەوەی سەر بباتەدەرێ دەیکوژن، ڕاوەستن هەونکە خەبەرەکمان لۆدێ، بەینەکی باش خۆمان کڕکرد، وەختەکی دەنگی تەقەی کزبوو، جارجار چەند فیشەکەک لەولاولەولا دەتەقی، بەران دەنگی قیژوهۆڕەکەی هەر زیادی دەکرد، لەخۆمەوە وام بەخەیاری داهات بابی نازەی کوژرابی، گۆتمە مام قەتۆی: دەبی بابی نازەی نەکوژرابی؟ گۆتی: شەڕەو دەبی چاوەڕێی هەموو چشتکی بکەین، وەختەکی کوڕەکەی مام قەتۆی بەژۆرێ کەت و گۆتی: وەڵلا بابۆ خەبەرم دا ئۆدەی(دایە)کەوا ئەتوو سەلامەتی، بەران وەکی هاتمەوە لە ماڵی نازەی گێم لە گریان و شینەکی زۆربوو، مام قەتۆ گۆتی: نەتزانی کێ کوژرایە؟ گۆتی: ناوەڵلا شەڕەکی زۆر تووندبوو، هەر خوا ڕەحمیکرد هیچم پێنەکەت، گۆتی: ئەدی مام پرینگ لە گوندی مایە؟ گۆتی: بەڵێ مایە، چاوەڕێیە شەڕەکە سووکبی و بڕوا، مام قەتۆ گۆتی: دیارە شەڕ سووکبووە، چونکە دەنگی تەقەی کەمبووە، بایز گۆتی: ئەمن و دوویدی دەچین بزانین چ قەومایە لە ماڵی نازەی، گۆتم: ئەگەر مام قەتۆ پێی باشبی ئەمنیش دێم، مام قەتۆ گۆتی: وەرە ئەتوو لەکنەمن دانیشە، هەونکە خەبەرەکمان لۆدێ!
مایتی.
نووسینی: ئوسامە جەمیل عەلی.
عربي
