سەرلە بەیانی ئەمڕۆ جارێکی تر شاندی دانوستانکاری هەرێم لە ڕێگای فڕۆکەخانەی نێودەوڵەتی هەولێرەوە بەرەو بەغدا بەڕێکەوتن.

شاندەکەی هەرێم پێکهاتووە لە ”ئاوات شێخ جەناب، وەزیری دارایی و ئومێد سەباح، سەرۆکی دیوانی ئەنجومەنی وەزیران و کەمال محەمەد، وەزیری سامانە سروشتیەکان بەوەکالەت و جوتیار عادل، وتەبێژی حکومەتی هەرێم و کۆمەڵێک بەرپرسی تەکنیکی لەسەر ئاستی ڕاوێژکار و بریکاری وەزیر هاوڕێیەتی شاندەکە دەکەن”.

سەردانی ئەمڕۆی شاندی هەرێم بۆ گفتوگۆکردنە لەگەڵ وەزیری نەوت و تیمی وەزارەتی نەوتی عێراق لەسەر ئەو ڕەشنوسەی بۆ یاسای نەوت و غاز ئامادەکراوە. شاندەکە دوای گەڕانەوەیان بۆ هەرێم لە هەفتەی ڕابردوو سەرنج و تێبینیەکانیان لەسەر ڕەشنوسەکە دەگەیەننە بەغدا.

جگە لە پرسی یاسای نەوت و غاز، گفتوگۆ لەسەر یاسای بودجە دەکرێت و حکومەتی عێراق هەوڵەکانی چڕ کردووەتەوە تا لە ماوەی ۱۰ ڕۆژی ئایندە ڕەوانەی پەرلەمانی عێراقی بکات.

حکومەتی عێراق، دەیەوێت لەو ماوەیەدا هەرسێ گرفتی ڕێکەوتن لەگەڵ هەرێم و دیاریکردنی نرخی نەوت و گونجاندنی بودجە بەپێی نرخی نوێی دۆلار چارەسەر بکات.

جگە وەزیری دارایی هەرێم، سەرجەم ئەندامانی شاندەکە لە تیمی پارتین لە حکومەت. یەکێتی بەردەوامە لە بایکۆتی کۆبونەوەکانی ئەنجومەنی وەزیران و شاندەکانی هەرێم بۆ بەغدا.