عێراق لە نۆ مانگی ئەمساڵدا، 71 ملیار و 150 ملیۆن دۆلاری لە فرۆشتنی نەوت دەستکەوتووە.

 

وەزارەتی نەوتی عێراق، ئاماری فرۆشتنی نەوتی نۆ مانگی ئەمساڵی بڵاوکردەوە، بەپێی ئامارەکان لەو ماوەیەدا لەرێگەی کۆمپانیای بەبازاڕکردنی نەوت "سۆمۆ"ـەوە بڕی 71 ملیار و 150 ملیۆن دۆلاری لە فرۆشتنی نەوت دەستکەوتووە.

 

 

بەراورد بە ساڵی رابردوو، داهاتی فرۆشتنی نەوت کەمی کردووە بەو پێیەی لە نۆ مانگی یەکەمی ساڵی 2022 بڕی 90 ملیار و 480 ملیۆن دۆلار بووە.

 

هەر بەپێی ئامارەکە، زۆرترین داهاتەکانی ئەمساڵیش لە مانگی ئەیلوولی رابردوو بووە کە 9 ملیار و 490 ملیۆن دۆلار بووە، کەمترین داهاتەکانیش لە مانگی شوبات بووە کە 7 ملیار و 60 ملیۆن دۆلار بووە.

 

بەپێی زانیارییەکان، پیشبینییەکان ئەوەیە ئەمساڵ بەهای هەر بەرمیلێک نەوت بگاتە 100 دۆلار و بەو پێیە لە رێگەی زیادەی داهاتی بەدەستهاتوو، عێراق کورتهێنانەکەی لە بودجەی ساڵی 2023 پڕدەکاتەوە.

 

لە یاسای بودجەی عێراقدا بۆ ساڵی 2023، بەهای هەر بەرمیلێک نەوتی بە 70 دۆلار خەمڵێبدراوە.