بوار نیوز، وردەکاری شەڕەکەی دوێنێ شەوی باڵەکایەتی بڵاودەکاتەوە

بوار نیوز، چۆمان
بوار نیوز وردەکاری شەڕەکەی دوێنێ شەوی مەڕدارەکانی بەرەکەو خەڵکی کوێستانەکانی باڵەکایەتی بڵاودەکاتەوە.
مەڕدارەکانی گوندی بەرەکەی خۆشناوەتی بۆ لەوەڕاندنی ئاژەڵەکانیان رویان لە لەوەڕگەکانی کوێستانەکانی باڵەکایەتی کردوەو بەو وتەی دانیشتوانی ناوچەکە ئەو مەڕدارانە بەبێ هیچ بەڵگەیەک خۆیان کردوە بەخاوەنی ئەو کوێستانانەو دەیانەوێت داگیری بکەن.
لەماوەی رابردودا چەند جارێک کێشە لەسەر ئەو کوێستانانە دروست بوە لەنێوان خەڵکی ناوچەکەو مەڕدارەکانی بەرەکە، بەڵام لەرێگەی سوڵحی عەشایەرییەوە کێشەکان چارەسەرکراون و بەڵێن لەبەرەکەییەکان وەرگیراوە کە ناوچەکە جێبهێڵن. بەڵام بەوتەی دانیشتوانی ناوچەکە تا ئێستا ئەو ناوچەیان جێنەهێشتوە.
بۆ چارەسەرکردنی کێشەی نێوان بەرەکەییەکان و خەڵکی باڵەکایەتی وەفدێکی خەڵکی باڵەکایەتی سەردانی سەرۆکایەتی پەرلەمانی کوردستان و پارێزگاری هەولێرییان کرد بۆ ئەوەی کێشەکەیان بۆ چارەسەر بکەن.
خەڵکی ئەو ناوچەیە لەدوای ئەو سەردانانە چەند جارێکی دیکە مەڕدارەکانی بەرەکەییەکانیان ئاگادارکردوەتەوە کە بەڵێنەکانی خۆیان لەبارەی چۆڵکردنی ئەو ناوچەیە جێبەجێ بکەن. بەڵام هیچ وەڵامێکی ئەرێنیان بۆ دانیشتوانی ناوچەکە نەبوە.
دواجار دوێنی شەو 11ی تەموز، خەڵکێکی ناوچەکە بەچەکەوە روبەڕوی چەکدارانی بەرەکەیی وەستاون و داوای چۆلکردنی ناوچەکەیان لێکردون. بەڵام لەئەنجامدا بوەتە هۆی تەقەکردنێکی زۆر لەلایەن هەردولاوەو چەکی جۆراو جۆر لەو تەقەکردنە بەکارهاتوە.
بەوتەی دانیشتوانی ناوچەکە لەئەنجامی تەقەکردنی هەڕەمەکی لەلایەن بەرەکەییەکان کەسێکی بەرەکەی کوژراوەو یەکێکی دیکەش بەسەختی بریندار بوە.
بەوتەی دانیشتوانی ناوچەکە، بەرەکەییەکان تەقەیان لەو کەسانە کردوە کە خزمی خۆیان بون و لێیان نزیک بون، وایانزانیوە خەڵکی ناوچەکان و لێیان نزیک بونەتەوە. بۆیە ئەو دو کەسە بونەتە قوربانی.
لەئێستا خەڵکێکی زۆری باڵەکایەتی لەناوچەکە کۆبونەتەوەو داوا دەکەن بەرەکەییەکان ناوچەکە جێبهێڵن بۆ ئەوەی روداوی دیکەی نەخوازراو رونەدات. هێزێکی زۆری ئاسایش و پۆلیس و پێشمەرگەکان بۆ رێگریکردن لەروداوی دیکە.