پارتی لە پارێزگای کەرکوک لقێکی نوێی بۆ ڕێکخستنەکانی دروست کرد و لەچەند ڕۆژی ڕابردوو هەڵبژاردن لە ئۆرگانەکانی ئەو لقە نوێیە ئەنجام دراو بڕیارە لە ئایندەیەکی نزیکدا لێپرسراوێکی بۆ دیاری بکرێت و دەست بەکارەکانی بکات. لقی ۲٥ی دەوروبەری کەرکوک ناوچەکانی دەوروبەری پارێزگای کەرکوک دەگرێتەوە بریتیە لە قەزای دوبز و ناحیەکانی پردێ و سەرگەڕان و شوان و قەرەهەنجیر و لەیلان و قەزای داقوق و دووز و ناحیەی قادرکەرەم. لقی ۲٥ی دەوروبەری کەرکوک لە ۱۰ ناوچە پێک دێت و هەشت ناوچەی لە لقی ۳ی کەرکوک و دوو ناوچەی لە لقی ۱۹ی چەمچەماڵ جیاکراوەتەوە. پارتی دیموکراتی کوردستان لە هەڵبژاردنی ئەنجومەنی نوێنەرانی عێراق ٤۹ هەزار دەنگی لە پارێزگای کەرکوک بەدەست هێناو دوو کورسی پەرلەمانی عێراقی بردەوەو لە هەڵبژاردنی ئەنجومەنی پارێزگای کەرکوکیش لە کۆتای ساڵی ۲۰۲۳ ئەنجامدرا ٥۲ هەزار دەنگی بەدەست هێناو دوو کورسی ئەنجومەنی پارێزگای کەرکوکی بردەوە.