بەڕێوەبەری گشتی تەندروستی هەڵەبجە جەخت لەوەدەكاتەوە كە ناچنە ژێر باری جێبەجێكردنی بڕیارێكی وەزارەتی تەندرووستیی هەرێمی كوردستان بۆ پێدانی تاقیگە حكومییەكان بە كۆمپانیای تایبەت د.ئازاد مستەفا، بەڕێوەبەری گشتیی تەندروستیی هەڵەبجە بواری رایگەیاند: بەهۆی ئەو گرێبەستەی وەزارەتی تەندروستی لەگەڵ كۆمپانیاكان كردوویەتی بۆ پێدانی تاقیگەكان، بۆ بەرژەوەندی تایبەتییە، بۆیە نامەوێت بازرگانێك دەوڵەمەند بكەم و ئێمە ناچینە ژێر باری بڕیاری رادەستكردنی تاقیگە حكومەییەكان بە كۆمپانیای تایبەت. ئاماژەی بەوەشكرد، بەهۆی كەمیی بودجەوە كە لەلایەن حكومەتەوە بۆ كەرتی تەندرووستیی پارێزگاكە دابینكراوە، هانایان بۆ حكومەت و رێكخراوە نێودەولەتییەكان تەنانەت كۆمپانیا تایبەتەكان بردووە كە هاوكاریی پێشكەش بە تەندرووستیی هەڵەبجە بكەن. بەڕێوەبەری گشتی تەندروستی هەڵەبجە ئەوەشی وت، هیچ لۆژیكێك قبوڵ ناكات بچم بە 10 هێندەی پارەی ئێستا پشكنینێك ئەنجام بدەم، بڕیارەكە جگە لەوەی بەهەدەردانی سامانی گشتییە، هاوكات نەزیفە لەسەر داهاتی گشتی، بۆیە دەكرێت ئەو پارەیە بگەڕێتەوە بۆ شتێكی تر.