بوار، تایبەت وابڕیارە رۆژی یەكشەممەی داهاتوو پەرلەمانی عێراق کۆببێتەوەو لە برگەیەکی دانیشتنەکەش دەنگدان دەکرێت لەسەر هەمواری پرۆژەیاسای بودجە و دەستکردنەوە بەهەناردەکردنەوەی نەوت. بەگوێرەی زانیارییەکانی بوار، یەک شەممەی داهاتوو ئەنجومەنی نوێنەران دانیشتنی هەیە، دەنگدان لەسەر هەمواری یاسای بودجە لە بەرنامەی كاردایە، هەموارەكە تایبەتە بە هەرێمی كوردستان، تێچووی بەرهەمهێنانی هەر بەرمیلێك نەوت لە كوردستان لە شەش دۆلاری بودجەوە بەرزكراوەتەوە بۆ 16 دۆلار. ئاماژەبەوەشکراوە، ئەوبڕە پارەیە بەشێوەیەكی كاتی دیاریکراوە تا ئەوكاتەی لەماوەی 60 رۆژدا دوای بەركاربوونی هەمواری بودجە، كۆمپانیا یاخود لایەنێكی پسپۆڕی نێودەوڵەتیی، بەجیاو بۆ هەر كێڵگەیەك لە كوردستان خەمڵاندن بۆ تێچووی بەرهەمهێنانی نەوت دەكات. لە یاسای بودجە بۆ سەرتاسەری عێراق بڕی شەش دۆلار بۆ تێچووی بەرهەمهێنانی هەر بەرمیلێك نەوت دیاریكردبوو، كاتێك لە كۆتاییەكانی حوزەیرانی 2023 یاسای بودجە چووە بواری جێبەجێكردن، ئەمە ناڕەزایەتی حكومەتی هەرێمی لێكەوتەوە، چونكە تێچووی بەرهەمهێنان و گواستنەوەی هەر بەرمیلێك نەوت لە كوردستان بڕی (31) دۆلارە. هەموارەكە بۆ ئەوەیە لە كۆتایدا هەردوو حكومەتی هەولێر و بەغداد لەسەر نرخێكی نوێی تێچووی بەرهەمهێنان بگەنە رێككەوتن، بۆیە کۆبوونەوەکەی ڕۆژی یەک شەممە بە ڕۆژێکی یەکلاکەرەوە دادەنرێت بۆ دەستکردن بە هەناردەکردنەوەی نەوتی هەرێم.