پەرلەمانتاری پێشووی بزووتنەوەی گۆڕان پەیمان عیزەدین لە لاپەڕەی خۆی نوسینێکی لەسەر بەشداری کردنی لە خۆپیشاندانی ئەمڕۆ بڵاوکردووەتەوە کە ئەمەی خوارەوە دەقەکەیەتی: ئەمڕۆ وەک سەدان خەڵکی تر لە سلێمانی ، بەشداری خۆپیشاندانم کرد لەگەڵ ئەوەی ئەشزانم بەشێک لە مامۆستایانی مانگرتوو و مامۆستایانی ناڕازی یەکێتین . بە ڕەزامەندی یەکێتی ناڕەزایەتی دەردەبڕن و هەر بە ڕەزامەندی یەکێتیش کوێری ئەکەنەوە. بەدرێژایی ئەم دە ساڵەی پێشوو لە زۆرینەی خۆپیشاندانەکاندا هەبوم ، ‌دە ساڵە لە سلێمانیدا دوو جۆر خۆپیشاندان هەبووە ، خۆپیشاندانێک لەدەرەوەی ئیرادەی حیزب و بەردەوام ڕوبەڕوبونەوەی تیابووە، خەڵکی تیا دەستگیرکراوە و ئازار دراوە. خۆپیشاندانێکیش یەکێتی بەگەڕی خستوە بۆ دەستبادانی پارتی بووە. ئەو خۆپیشاندان و ناڕەزایەتیەی یەکێتی ئەیجوڵێنێ پێش پێکهێنانی هەر کابینەیەک ، دروستبونی هەرناکۆکیەک لەگەڵ پارتی، ئەوا خۆپیشاندانێک بووە کە وەرگرتنی ڕەزامەندی نەویستووە ، پۆلیسی هاتوچۆ و چالاکیە مەدەنیەکان ڕێگا ئەکەنەوە و ئارامی ئەپارێزن. هەر کاتێکیش لەدەرەوەی خواستی یەکێتی خۆپیشاندان کرابێ ،هێزی دەمامکدار و جل ڕەش و سەیارە و چەکی تۆقێنەر لە خۆپیشاندەران زیاتربون ، کۆڵانەو کۆڵان ڕاونراوین ، بەغازی فرمێسک ڕێژ و بیبەر و چەندین شێوازی تر ڕوبەڕومان وەستاونەتەوە. ئەمەی ئەمجارە بۆ دەستبادانی پارتیە و مەعلومە ، بەڵام لەگەڵ ئەوەشدا گرنگە ئەو دەرفەتە بقۆزرێتەوە ، سەرەنجام شارو کۆمەڵگەیەکی مت و بێدەنگ یەکسانە بە مردنی سیاسی و کۆمەڵایەتی ، لە دنیاشدا زۆر ڕویداوە ناڕەزایەتی و خۆپیشاندان بەو جۆرە کۆتایی نەهاتووە کە بڕیاری لەسەر دراوە. بۆیە ئەوەی ئەبێ لەسەری بوەستین قۆستنەوەی هەموو دەرفەتێکە بۆ دەربڕینی ناڕەزایەتی ، چونکە ناهەقی و زوڵم و ناعەدالەتی حەقیقەتن و ڕوبەڕوبونەوەشیان ئەرکێکی ئەخلاقیە ، گرنگ ئەوەیە چۆن کۆتایی بە قۆرخکردنی ناڕەزایەتیەکان بهێنرێ لەلایەن یەکێتیەوە ؟ چۆن بچینە دەرەوەی بازنەی خراپ بەکارهێنانی گیانی ڕوبەڕوبونەوە و تێکۆشان بەخزمەتی بەرژەوەندیەکانی یەکێتی ؟ بێگومان ئەمە ڕێکخستن و کۆبونەوەی سەرجەم لایەنەکانی دەرەوەی یەکێتی ئەوێ کە بەداخەوە لە ئێستادا بونی نیە ..