سكرتێری پارتی سۆسیال دیموركاتی كوردستان لەسەر ڕووداوەكانی ئەمڕۆی كەركوك بێدەنگی شكاند و لە پەیامێكدا كە ئاراستەی سوپای عێراقی كردووە بە شێری ماڵ و ڕێوی مەیدانی شەڕەكانیان وەسف دەكات. لەپەیامەكەی محەمەدی حاجی مەحمود ئەوەهاتووە، بەداخەوە دوانیوەڕۆی ١٧-٢-٢٠٢٥ هەندێك سەربازی سوپای عێراق، بەشێوەیەكی دڕندانەوە نامرۆڤانەو نابەرپرسانەو بێڕێزانە، پەلاماری جوتیارانی كوردی كەركوكیان لەسەر موڵك و ماڵ و گۆڕی بابوباپیرانیان، دا، وێڕای ئەوەی زۆر بەتوندی ئیدانەی ئەو هەڵوێستەیان دەكەین، وەك پارتی سۆسیال دیموكراتی كوردستان ئامادەی هەموو ئەگەرێك و پشتیوانییەكین، ئاماژەی بەوەشكردووە، سوپای عێراقی مێژوو پڕ لەتاوانی دژی كورد، بەم هەڵوێستەیان سەلماندیان درێژەپێدەری هەمان ئەوسوپایەن، كەتاوانەكانی وێرانكردنی كوردستان و ئەنفال و كیمابارانیان ئەنجامداوەو تاوانی دژبەكورد بووەتە پیشە، هاوكات ئەم سوپایە هەمیشە سوپایەكی دۆڕاو ترسنۆك دیل و زەلیلی مەیدانی جەنگەكانی ئێران و كوەیت و ئەمریكاو ئیسرائیل بووە، كەچی هەمیشە قارەمانی دژی خەڵك و هاوڵاتیانی هەژاری كورد بووە. محەمەدی حاجی مەحمود ئەوەشی نوسیوە، ئەپرسین ئەم سوپا قارەمانەی عێراق بۆ ناچێت بەرگری لە غەزەو فەلەستین بكات، با نەیارانی كورد بزانن چیتر سوكایەتیكردن بەجوتیارانی كورد قبوڵناكرێت.