بەگوێرەی ڕاپۆرتێكی گۆڤاری فۆربس، نوێترین لیستی ملیاردێرەكانی جیهانی بڵاوكردەوە و ئاشكرای كرد؛ ئەمساڵ بەراورد بە ساڵی رابردوو 247 ملیاردێر زیادیانكردووە و ژمارەی ملیاردێرەكان گەیشتووەتە سێ‌ هەزار و 28 ملیاردێر بەگوێرەی ناوەڕۆكی ڕاپۆرتەكەی ئەو گۆڤارە جیهانییە، ئەمە یەكەمجارە ژمارەی ملیاردێرەكانی جیهان سێ هەزار كەس تێبپەڕێنێت، كە كۆی گشتیی سامانەكانیان گەیشتووەتە 16.1 تریلیۆن دۆلار، ئەمەش دوو تریلیۆن دۆلار زیاترە لە سامانی ملیاردێرەكان لە ساڵی رابردوودا ئاماژە بەوەشكراوە، كۆی سامانی ملیاردێرەكانی جیهان زیاترە لە كۆی بەرهەمی ناوخۆیی هەموو وڵاتانی جیهان جگە لە ئەمریكا و چین، چونكە تێكڕای سامانی هەریەكە لە ملیاردێرەكانی جیهان ، 5.3 ملیار دۆلارە كە 200 ملیۆن دۆلار بۆ هەر ملیاردێرێك زیادیكردووە. بەپێی راپۆرتەكەی فۆربس، لەنێوان لیستی ملیاردێرەكانی جیهاندا، بۆ یەكەم جارە سێیان سامانیان لە 200 ملیار دۆلار زیاترە، هاوكات 15 ملیاردێریش هەن كە سامانەكانی هەر كامەیان زیاتر لە 100 ملیار دۆلارە. بەگوێرەی ڕاپۆرتی گۆڤاری فۆربس، دەوڵەمەندترین كەسی جیهان، (ئیلۆن مەسك)ە كە سامانەكەی بە 342 ملیار دۆلار مەزەندە دەكرێت، هاوكات (مارك زۆكەربێرگ)، بۆ یەكەم جار بووەتە دووەم كەسی دەوڵەمەندی جیهان و سامانەكەی بەرزبووەتەوە بۆ 216 ملیار دۆلار، هەروەها (جێف بیزۆس)، دامەزرێنەری كۆمپانیای ئەمازۆن بە هەبوونی 215 ملیار دۆلار، بە سێیەم گەورەترین دەوڵەمەندی جیهان ناوی هاتووە، هاوكات ئیدارەی ترەمپ لانیكەم 10 كەسی تێدایە كە خۆیان یان هاوژینەكانیان ملیاردێرن.