بەرپرسەی دەستەی كارگێری مەكتەبی سیاسی پارتی ئاماژە بەوەدەكات، كردنەوەی بارەگاكانمان لە كەركوك بۆ ڕاستكردنەوەی ئەو مێژووەیە كە خەریكە دەشێوێندرێت، چونكە لە غیبابی ئێمە لە كەركوك زۆر هێزخۆیان بە هێزی سەرەكی دەزانن بەڵام بەوجۆرە نییە بانگەشەی بۆ دەكەن. فازیل میرانی، بەرپرسەی دەستەی كارگێڕی مەكتەبی سیاسی پارتی لە كەركوكەوە ڕایگەیاند: هەمیشە یەكێك لە كێشەكانی ئێمە ئەوەیە كە خۆمان سەر قاڵ ئەكەین بە دەرئەنجامەكان لە بری ئەوەی خۆمان بە هۆكارەكانی سەركەوتن یاشكستەكانمان سەر قاڵ بكەین، بۆیە ئێمە سورین لەسەر ئەوەی كە دەبێت پێچداچوونەوە بكرێت لە كوردستان. ئاماژەی بەوەشكرد، كردنەوەی بارەگاكانمان لە كەركوك بۆ ڕاستكردنەوەی ئەو مێژووەیە كە خەریكە دەشێوێندرێت، چونكە لە غیبابی ئێمە لە كەركوك زۆر هێزخۆیان بە هێزی سەرەكی دەزانن بەڵام بەوجۆرە نییە بانگەشەی بۆ دەكەن، بۆیە زۆر گرنگە لەم قۆناغەدا كابینەی نوێی حكومەتی هەرێم پێك بێت و پەرلەمان كارا ببێت بۆ ئەوەی وەك پێشتر هێزی خۆمان بگەرێنینەوە بۆ كەركوك. ئەو بەرپرسەی پارتی ئەوەشی خستەڕوو، من ئەمڕۆ پێشم خۆشبوو كە لەكردنەوەی بارەگای پارتی لە كەركوك یەكێتی وحزبە ئیسلامییەكان لەگەڵماندا بوونایە، ئەوە نیشانەی یەكڕیزی كوردی نیشانی لایەنەكانی دیكە دەدا، بەڵام كە ئامادە نەبوون خۆیان بەرپرسن، چونكە ئەم پارتییە پارتییەكی نوێ نییە بەڵكوو هەر پارتییەكەی جارانە.