دامەزراوەی پەی رایدەگەیەنێت، پەرلەمانتارانی خولی شەشەمی پەرلەمانی کوردستان مووچەی سێ مانگیان وەرگرتووە بەبێ دەوام کردن کە ئەمە پێچەوانەی یاسایە. دامەزراوەی پەی بۆ پەروەردە و گەشەپێدان لە نوێترین راپۆرتی خۆیدا کە سەبارەت بە خولی شەشەمی پەرلەمانی کوردستان بڵاویکردووەتەوە، پەرلەمانتارانی خولی شەشەم سێ مانگ مووچەیان وەرگرتووە کە ئەمە پێچەوانەی یاسایە، چونکە هیچ ئەرکێکیان نەبینیوە. ئاماژەی بەوەشکردووە، لە ماوەی ئەم سێ مانگەدا هەر پەرلەمانتارێک مانگانە حەوت ملیۆن و 700 هەزار دینار مووچەی وەرگرتووە واتە بە تێکڕا نزیکەی 23 ملیۆن و 100 هەزار دینار مووچەیان وەرگرتووە، کە بە هەموویان دوو ملیار و 240 ملیۆن و 700 هەزار دیناریان وەرگرتووە. لە بەشێکی دیکەی راپۆرتەکەدا هاتووە، دواخستنی هەڵبژاردنی دەستەی سەرۆکایەتی پەرلەمان کاریگەریی نەرێنی لەسەر رەوشی هەرێم دەبێت، چونکە تا دەستەی سەرۆکایەتیی هەڵنەبژێردرێت ناتوانرێت لیژنەکانی پەرلەمان پێکبهێنرێن، رێککارەکانی هەرڵبژاردنی سەرۆکی هەرێم ناگیرێنەبەر، کوتلەی براوە بۆ پێکهێنانی کابینەی نوێ دەستنیشانناکرێت و حکومەتی کاربەڕێکەر لە کارکردن بەردەوامدەبێت.