یەكێك لە ئەندامانی كۆنفرانسی نشتیمانی باڵی گردەكە ئاماژە بەوەدەكات كە لە ژێر فشاری سیاسیدا كۆمیسیۆن نوێنەری خۆی نەناردووەتە كۆنفرانسەكەمان، بۆیە ئێمە لەدادگای باڵای فیدراڵی سكاڵای یاسایی لەسەر سەرۆكی كۆمیسیۆن تۆماردەكەین. دانا عەبدولكەریم، ئەندامی كۆنفرانسی سێیەمی بزوتنەوەی گۆڕان باڵی گردەكە ڕایگەیاند: كرنفراسەكەمان زۆر سەركەوتوو بوو،بەڵام بەداخەوە نوێنەری كۆمیسیۆن لەژێر فشاری سیاسیدا ئامادە نەبوون لە كۆنفرانسەكەدا، چونكە سەرۆكی ئەنجومەنی كۆمیسیاران بەشێوەیەكی ناتەندروست تەداخولی كردووە بەوەی كە نوێنەری كۆمیسیۆن نەیەتە كۆنفرانسەكەوە. ئاماژەی بەوەشكرد، ئێمە هەموو ڕێكارەكانی بەستنی كۆنفرانسمان تەواوكردووە، بەڵام لەوڵاتێكداین كە تەداخولی سیاسی كاریگەری لەسەر هەموو سێكتەرەكان هەیە، بۆیە ئێمە لەدادگای باڵای فیدراڵی سكاڵای یاسایی لەسەر سەرۆكی كۆمیسیۆن تۆماردەكەین چونكە بە بڕیارێكی سیاسی ڕێگربووە لەوەی نوێنەری كۆمیسیۆن لە كۆنفراسەكەمان ئامادە بێت. دانا عەبدولكەریم، ئەوەشی خستەڕوو، جارێ‌ زووە خۆم بۆ رێكخەری گشتی گۆڕان هەڵبژێرم چونكە لەم كاتەدا دەمانەوێت گۆران هەستێنینەوە و لەگەڵ ئەوانەی بەهەر هۆكارێك بووە جیابوونەتەوە ئاشت ببینەوە.