یەكێك لە دامەزرێنەرانی بزوتنەوەی گۆڕان ڕتیدەكاتەوە كە خۆی بۆ هیچ پۆستێك پاڵاوتبێت و بێ‌ ئاگایی خۆی ڕادەگەیەنێت لەوەی كە بووبێتە دەنگی یەكەمی كۆنفرانسەكەی ئەمڕۆی باڵی گردەكەی بزوتنەوەی گۆڕان. محەمەد تۆفیق رەحیم، یەكێك لە دامەزرێنەرانی بزوتنەوەی گۆران ڕایگەیاند: من ئاگام لە هیچ نیەو خۆم بۆ هیچ پۆستێك نەپاڵاوتووەو ئاگام لەو لیستە نیە كە بڵاوكراوەتەوەو ناوی منی تیایە. ئەوەش لەكاتێكدایە كە لە كۆنفرانسەكەی ئەمڕۆی بزووتنەوەی گۆڕان باڵی گردەكە، دوای تەواوبوونی كارەكانی كۆنفرانسەكەیان لەدوو لیستدا ناوی 55 كەسیان بۆ ئەندامی جڤاتی نیشتمانی بزووتنەوەی گۆڕان بڵاوكردەوە، بەجۆرێك كە (محەمەد تۆفیق رەحیم) یەكەمی ئەو دوو لیستە بوو كە بووەتە ئەندامی جڤاتی نشتیمانی.