لێپرسراوی مەڵبەندی سلێمانی یەكێتی نیشتمانی كوردستان، ئاماژە بەوەدەكات چاوەڕێین خوای گەورە قەرەبووی خاوەن دووكانە سوتاوەكانی بازاڕی دارەسوتاوەكەی سلێمانی بكاتەوە، دەشڵێت لە نزیكەوە سەردانی بازاڕەكەمان كردووە بۆ دەربڕینی هاوخەمی. زیاد جەبار، لێپرسراوی مەڵبەندی سلێمانی یەكێتی نیشتمانی كوردستان ڕایگەیاند: بەمەبەستی دەربڕینی هاوخەمی بۆ ئەو كاسبكارانەی كە لەبازاڕی دارەسووتاوەكەی سلێمانی بەرەبەیانی ئەمڕۆ دووكانەكانیان سووتاوە، سەردانی ناو بازاڕی دارە سووتاوەكەمان كرد، چاوەڕێین خوای گەورە قەرەبووی بكاتەوە و ئێمەش پشتیوانیان دەبین و لەگەڵیان دەبین، داواش لەلایەنە پەیوەندیدارەكان دەكەین بەزووترین كات هەستن بە نۆژەنكردنەوەی دوكانەكان و هەرچیش بەئێمە بكرێت پشتیوانیان دەبین. ئاماژەی بەوەشكردووە، زیانێكی زۆر بە دووكان و كاسبكارانی ئەو بازاڕە كەوتووە، ئێستا سەرقاڵی دروستكردنی ئەنجومەنێكن بەمەبەستی لێكۆڵینەوە و بەدواداچوون بۆ قەرەبووكردنەوە و نۆژەنكردنەوەی دوكانەكان، ئێمەش دەبین بە بەشێك لە ئەنجومەنەكە. ئەو بەرپرسەی یەكێتی لە سلێمانی باسی لەوەشكردووە، ئێمە وەك یەكێتی نیشتمانی چیمان پێبكرێت بۆ ئەو دوكاندارانە ئەنجامی دەدەین و درێغی ناكەین، هاوكات هەموو دام و دەزگاكانی حكومەت رادەسپێرین كاری خۆیان ئەنجام بدەن.