لە نزیک کاتژمێر ٨ی بەیانی بۆ ماوەی دە خولەک چاوی دادەخات. پاشان گیان لە دەست دەدات. تا ئەو ساتە پاسەوان و کارمەند و کادرەکانی گۆڕان نازانن دۆخی نەوشیروان مستەفا هێندە خراپبووە و کۆچی دوای کردووە. قادری حاجی عەلی لەسەر پەڕەیەکی ئەی فۆڕ هەواڵی کۆچی دوای نەوشیروان مستەفا بەناوی بزوتنەوەی گۆڕانەوە دەنوسێت و لە کاتی نوسینەکەدا بەکوڵ دەگرێت. لەشەش دێڕدا شەش جار هەڵە دەکات و بە پێنوسەکەی دەیکوژێنێەوە و هەواڵی مردنەکەی بەم شێوەیە دەبێت: کۆمەڵانی خەڵکی کوردستان بەداخ وپەژارەیەکی زۆرەوە ئەمڕۆ تێکۆشەر وسەرکردەی گەورەی گەلەکەمان نەوشیروان مستەفا پاش ململانێیەکی زۆر لەگەڵ نەخۆشیدا لە سەعات ٨ ی بەیانی کۆچی دوای کرد. بزوتنەوەی گۆڕان، وێڕای سەرەخۆشی لە کەس و کاری و خۆمان و گەلەکەمان و دوپاتی دەکاتەوە لەسەر ڕێڕەو و بەرنامەی ئەو سەرکردە مەزنە بەردەوام دەبێ بۆ خزمەتی کوردستان. ئەو ڕۆژە تەرمەکەی بەخاک ناسپێردرێت ودەبرێتە نەخۆشخانەی فاروق و ڕۆژی دواتر لە مەراسمێکدا دەهێنرێتەوە بۆ گردی زەرگەتە و لەوێ بەخاک دەسپێردرێت و بەهۆی سەرسامی بە حافزی شیرازی وەسێت دەکات گۆڕەکەی هاوشێوەی ئەو بێت.
عربي
