گرنگ

بوار گەندەڵی لەشێوازی دابەشکردنی خۆراکی مانگانە لە پارێزگای هەولێر ئاشکرا دەکات


 

"بەبێ‌ ئەوەی شیری منداڵان دابەش بکرێت پارە لە هاوڵاتیان وەردەگیرێت"

بوار نیوز، تایبەت
ئەندامێکی فراکسیۆنی یەکێتی نیشتمانی کوردستان لەئەنجومەنی پارێزگای هەولێر لە بەدواداچوونێکیدا، کۆمەڵێک "کەم و کوڕی و گەندەڵی" لەشێوازی دابەشکردنی خۆراکی مانگانە لە پارێزگای هەولێر ئاشکرا دەکات و دەشڵێت: "ئەو پارەیە لەبەرامبەر پێدانی خۆراکی بایەع لەهاوڵاتیانی هەولێر وەردەگیرێت بۆ بەغدا ناگەڕێندرێتەوە".
نافیز ناوپردانی، ئەندامی فراکسیۆنی یەکێتی لەئەنجومەنی پارێزگای هەولێر بە بواری راگەیاند: "بەپێی ئەو بەدواداچوونەی کردوومانە، دەرکەوتووە کۆگاکانی هەڵگرتنی خۆراک لە هەولێر، کە ژمارەیان 17 کۆگایە، مەرجی تەندروستی و سەلامەتیان تێدا نییەو هۆکارەکانی گەرمکەرەوەو فێنکەرەوەی تێدا نەماوە، چونکە کۆگاکان زۆر کۆنن لە ساڵانی حەفتاکانەوە دروستکراون، بۆیە بەدڵنیایەوە هیچ مەرجێکی تەندروستیان تێدا نییەو شیاو نین بۆ هەڵگرتنی خۆراک".
لەبەشێکی دیکەی بەدواداچوونەکەیدا، ئەو ئەندامەی ئەنجومەنی پارێزگای هەولێر ئاماژەی بەوە کردووە: "پارەی شیری منداڵان کە بۆ هەر منداڵێک بڕی 310 دینار لەلایەن بریکارەکانی خۆراکەوە لەهاوڵاتیان وەردەگیرێت، لەکاتێکدا ماوەیەکی زۆرە ئەو شیرە دابەش ناکرێت".
بەپێی یاسا ئەو پارەیەی لەبەرامبەر پێدانی خۆراک لەهاوڵاتیان وەردەگیرێت، دەبێت بگەڕێندرێتەوە بۆ بەغدا، لەبەرامبەردا حکومەتی عێراق سەرجەم خەرجییەکان لەنۆژەنکردنەوەی کۆگاکان و خەرجی گواستنەوەی خۆراک بۆ هەولێر لەئەستۆ دەگرێت، بەڵام بە وتەی نافیز ناوپردانی "بەهۆی نەگەڕانەوەی پارەکە، بەغدا ئامادەنییە هیچ هاوکارییەک بکات".
لەبارەی جۆرو کوالێتی ئەو خۆراکەی لەبەغداوە بۆ هەولێر دەنێردرێت و بەسەر هاوڵاتیان دابەش دەکرێت، نافیز ناوپردانی گوتی: "بەپێی بەدواداچوونی ئێمە، جۆری خۆراکەکان باشن و شیاون بۆ خواردن تەنانەت لەکۆنتڕۆڵی جۆری هەولێریش پشکنینی باش بۆ خۆراکەکان دەکرێت، ئەگەر شیاو نەبن رێگە بەسەرهاوڵاتیان نادەن دابەش بکرێت".
هاوکات نەوزاد شێح کامیل، بەڕێوەبەری گشتی بازرگانی لە وەزارەتی بازرگانی و پیشەسازی هەرێمی کوردستان بۆ بوار نیوز، تەنیا ئاماژەی بەوەکرد کە لێکۆڵینەوە بۆ بەدواداچوونی ئەندامەکەی ئەنجومەنی پارێزگای هەولێر دەکەن.

بڵاوی بکەوە
  • theme deafult color