٣٢ کیلۆ ماددەی هۆشبەر لەماڵەکەیدا دەستی بەسەردا گیرا

بوار، سلێمانی

بەپێی ڕاگەیاندراوێکی بەڕێوەبەرایەتی ئاسایشی سلێمانی، بازرگانێکی ماددەی هۆشبەر ڕوبەڕوی هێزەکانیان بووەتەوە، بەڵام تونیویانە ئەو بازرگانە دەستگیر بکەن و دەستیش بگرن بەسەر ٣٢ کیلۆ ماددەی هۆشبەردا. کە ئەمەی خوارەوە دەقی ڕاگەیاندراوەکەی ئاسایشی سلێمانییە;

دەستگیرکردنی بازرگانێکی ماددەی ھۆشبەر و دەستگرتن بەسەر بڕی ( ٣٢ ) کیلۆ ماددەی ھۆشبەر دا.

ھێزەکانی بەڕێوەبەرایەتی ئاسایشی پارێزگای سلێمانی لە چالاکیەکدا بازرگانێکی ماددەی ھۆشبەر دەستگیردەکەن و دەستدەگرن بەسەر بڕی ( ٣٢ ) کیلۆ ماددەی ھۆشبەر لەجۆری [ کریستاڵ ] و تۆمەتبار ڕووبەڕوی یاسا دەکەنەوە.

لە درێژەی ھەڵمەتەکانی بەگژداچوونەوەی بازرگانیکردن و بەکارھێنانی ماددەی ھۆشبەر، ھێزەکانی بەڕێوەبەرایەتی ئاسایشی پارێزگای سلێمانی ، لەسەر ڕاسپاردە و ڕێنماییەکانی سەرۆکی دەزگای ئاسایشی ھەرێم و

بە فەرمانی دادوەر ، لە شەوی ٢٠٢٢/٦/٢٢ لەسەر ڕێگەی سەرەکی نزیک ( گەڕەکی تاسلوجە ) ی شاری سلێمانی ، پاش کۆکردنەوەی زانیاری و چاودێریکردنی وورد ، ڕووبەڕوبونەوەی ھێزەکانی ئاسایش لەگەڵ تۆمەتبار و دروستبوونی تەقە ، توانیان بازرگانێکی ماددەی ھۆشبەر بەناوی ( ھ ، ڕ ، ب ) دەستگیربکەن و دەستبگرن بەسەر بڕی ( ٣٢ ) کیلۆ ماددەی ھۆشبەر لە جۆری کریستاڵ ، کە تۆمەتبار لەدەرەوەی ھەرێمی کوردستان ھێناوێتی یە ناو شاری سلێمانی و بەنیاز بووە بیبات بۆ شاری ھەولێر ، پێش بەئامانج گەیاندنی کارەکەی ، دەستگیر کرا و ماددە ھۆشبەرەکەش دەستی بەسەردا گیرا ، تۆمەتبار بەپێی ماددەی ( ٢٥ ) لە یاسای ماددە ھۆشبەرەکان ڕاگیراوە .

لێرەوە داوای لێبوردن لە ھاوڵاتیانی شاری سلێمانی بەگشتی و ھاوڵاتیانی ( گەڕەکی تاسلوجە ) بەتایبەتی دەکەین ، کە لەکاتی ئەم چالاکیەدا ، بۆماوەیەکی کاتی تەقە دروست بووە ، ھەموو لایەک ئاگاداردەکەینەوە کە ئێمە وەک ئاسایش ھەمیشە ھەوڵەکانمان بۆ سەقامگیری و ئاسایش و ئارامی بەردەوامە ، گەرچی ھەندێکجار دۆخەکە وادەخوازێ کە تەقە دروستببێت ، دووبارە داوای لێبووردن دەکەین.

بەڕێوەبەرایەتی ئاسایشی پارێزگای سلێمانی

٢٠٢٢/٦/٢٣