بوار نیوز، كەركوك

بەهۆی نوێنەكردنەوەی گرێبەستی فرۆشتنی نەوتی كەركوك بەوڵاتی ئوردن لەلایەن وەزارەتی نەوتی عێراق، هەناردەكردنی نەوت بۆ ئوردن راگیرا.

هەیبەت حەلبوسی سەرۆكی لیژنەی نەوت و گاز لەپەرلەمانی عێراق بەبوار نیوزی راگەیاند :" بەهۆی نوێنەكردنەوەی فرۆشتنی 10 هەزار بەرمیل نەوتی كەركوك بەوڵاتی ئوردن لەلایەن وەزارەتی نەوتی عێراق فرۆشتنی ئەو نەوتە راگیراوە."

ووتیشی :"پێشتر دوجار ئەو گرێبەستە لەنێوان ساڵی 2019 -2021 نوێكراوەتەوە و 10 هەزار بەرمیل نەوتی کەرکوک لە رێگەی تانکەرەوە دەگەیەندرایە ئوردن."

وەزارەتی نەوتی عێراق داهات و فرۆشتنی نەوتی مانگی ئازاری 2021ی بڵاوكردەوە بەجۆرێك فرۆشی نەوتی عێراق 91 ملیۆن و 311هەزارو 929 بەرمیل نەوت بوە، داهاتەكەی ( 5 ملیار و 782ملیۆن و 711) دۆلار بوە. لەو رێژەیەش بڕی هه‌نارده‌ی نه‌وتی خاو له‌ته‌واوی كێڵگه‌كانی كەركوكدا بۆ مانگی ئاداری 2021 گه‌یشتۆته‌ سێ ملیۆن و 71 هه‌زار و 745 به‌رمیل نه‌وت كە داهاته‌كه‌ی 194 ملیۆن و 812 هه‌زار و 869 دۆلار هەژماركراوە.