بوار:
نرخی نەوت لە بازاڕەكانی جیهان نزمبوونەوەیەكی گەورەی تۆماركردو بەپێی سەرچاوەكانیش بەشێكی نزیمبوونەوەكەی پەیوەندی بە دەنگۆكانی دەستپێكردنەوەی هەناردەی نەوتی هەرێم هەیە.

ئەمڕۆ سێ‌ شەممە لەبازاڕەكانی جیهان نزمبوونەوەیەكی گەورەی تۆماركرد، كە نزمترین ئاستە لە ماوەی سێ‌ مانگی رابردوودا تۆماریكردووە.

بەپێی ئاژانسی رۆیتەرز، بەیانی ئەمڕۆ هەر بەرمیلێك نەوتی خاوی برێنتی پێوانەیی جیهانی 99 سەنت بەرێژەی 1.08  لەسەدا دابەزیوەو بە 89.73 دۆلار مامەڵەی پێوەكراوە.

هەر بەپێی ئاژانسەكە، نرخی نەوتی خاوی تەكساسی ئەمریكا، كە نەوتی پێوانەیی ئەو وڵاتەیە، 92 سەنت بەرێژەی 1.04 لەسەدا دابەزیوەو هەر بەرمیلێكی بە 87.90 دۆلار مامەڵەی پێوەكراوە.

ئاژانسەكە بڵاویكردەوە، كە دابەزینی نرخی نەوت بەشێكی پەیوەندی بە دەنگۆكانی دەستپێكردنەوەی هەناردەی نەوتی هەرێم هەیە، كە وەزیری وزەی توركیا رایگەیاندبوو، بەم نزیكانە دەست بە هەناردەی نەوت لە هەرێمەوە بۆ بەندەری جیهانی توركیا دەكرێت.