عربي
دەبێت هەرێم بۆ سێ مانگ ۹٥۰ ملیار دینار ڕادەست بکات
بوار،
وەزارەتی دارایی عێراق بەنوسراوێک داوای داهاتی ناوخۆی هەرێم بۆ سێ مانگی سەرەتای ئەمساڵ دەکات و بەفەڕمی داوای لەحکومەتی هەرێم کردووە داهاتی نانەوتی بگەڕێنێتەوە بۆ خەزێنەی گشتی و وەزارەتی دارای عێراق.
لەنوسراوەکەدا داوای ڕادەستکردنی بڕی ۹٥۰ ملیار دینار داهاتی ناوخۆ لەهەرێم کراوە وەک داهاتی هەرسێ مانگی کانونی دووەم و شوبات و ئازار و بۆ هەرمانگێک داهاتی هەرێم بە ۳۱۷ ملیار دینار خەمڵێنراوە.
بەو پێیەی حکومەتی ناوەند و وەزارەتی دارایی بەپێی بڕیاری دادگای فیدڕاڵی پارەیان بۆ مووچەی هەرسێ مانگی سەرەتای ئەمساڵ ناردووە و لەهەمان بڕیار حکومەتی هەرێم پابەندکراوە بە یاسای بوودجەی عێراق بۆ ڕادەستکردنی داهاتی نانەوتی.
تا ئێستا ڕوون نیە حکومەتی هەرێم چۆن مامەڵە لەگەڵ داواکەی وەزارەتی دارایی عێراق دەکات و چۆن پاکتاوی داهات دەکات کە بەشێکی ئەو داهاتانە تەنها نیوەی بۆ هەرێم دەگەڕێتەوە .
