دوای ڕێکەوتنی یەکێتی لەگەڵ سێ ئەندامی عەرەبی ئەنجومەنی پارێزگای کەرکوک و هەڵبژاردنی پارێزگار و سەرۆکی ئەنجومەن دوو ئەندامی ئەنجومەنی پارێزگا لە بەرەی تورکمانی و هاوپەیمانی عەرەبی تا ئێستا هیچ ناڕەزاییەکیان دژی ڕێکەوتنەکە دەرنەبڕیووە، بەڵکو خواستیان هەیە بچنە ناو ڕێکەوتنەکە.

سەرەڕای ناڕەزایەکانی بەرەی تورکمانی، بەڵام تا ئێستا ئەحمەد ڕەمزی کۆپرلو ئەندامی ئەنجومەن و نزیک لە ئەرشەد ساڵحی بەفەڕمی ناڕەرایی دژی ڕێکەوتنەکە دەرنەبڕیووە. پێشتر لەگفتوگۆدا بووە لەگەڵ یەکێتی بەشداری کۆبونەوەی ئەنجومەنی پارێزگای کەرکوک بکات لە هوتێل ڕەشید. تەنانەت لە کاتی بەڕێوەچوونی کۆبونەوەکە لە شاری بەغدا بووە، بەڵام لەدوا ساتدا بەفشاری باڵوێزی تورکیا لە کۆبونەوەکەی ئوتێل ڕەشید بەشداری نەکرد.

هەرچەندە بەرەی تورکمانی لەکۆنگرەیەکی ڕۆژنامەنوسی دژایەتی خۆی بۆ ڕێکەوتنی یەکێتی و عەرەب دەربڕی، بەڵام ئەحمەد ڕەمزی لە پاڵ سەرکردەکانی بەرەی تورکمانی و ئەندامەکەی تری بەرەدا دەرنەکەوت.

ئەرشەد ساڵحی بە بەراورد سەرکردایەتی بەرەی تورکمانی نزیکترە لە یەکێتی و خواستی هەیە بۆ پتەوکردنی پێگەی خۆی بەشێک لە پۆستەکانی بەرکەوتەی پێکهاتەی تورکمان وەربگرێت و دەچێتە ناو ڕێکەوتنەکەی نێوان یەکێتی و بەشێک لەعەرەبەکانەوە.

ئەحمەد حەمدانی یەکێکی تر لە ئەندامانی عەرەبی ئەنجومەنی پارێزگای کەرکوکە بە هەمان شێوە هیچ ناڕەزاییەکی دژی ڕێکەوتنەکە دەرنەبڕیوە. لە دوای کۆبونەوەکەی ئوتێل ڕەشیدەوە بەتەواوی لە ڕاکان جبوری و هاوپەیمانی عەرەبی دوور کەوتوەتەوە هەرچەندە لەسەر هەمان لیست بووەتە ئەندامی ئەنجومەن.

ئەحمەد حەمدانی بێدەنگی هەڵبژاردووە لە هەڵبژاردنی پارێزگار و سەرۆکی ئەنجومەن و دەیەوێت ببێتە بەشێک لە ڕێکەوتنی یەکێتی و لایەنە عەرەبییەکان و لە کاتی دەربڕینی ناڕەزایەتی هاوپەیمانی عەرەبی و حزبی سیادە دەرنەکەوت و ئامادە نەبوو بەشداری کۆنگرەکەی خالید مەفرەجی و ڕاکان جبووری بکات دژی ڕێکەوتنی یەکێتی و بەشێک لە عەرەب.

بەهاتنە ناوەوەی ئەندامێکی تورکمان و ئەندامێکی عەرەب بۆ ڕێکەوتنەکە ژمارەی ئەندامانی پشتیوانی حکومەتی خۆجێی کەرکوک لە نۆ ئەندامەوە دەبێتە ۱۱ ئەندام.