#بوار بەهمەن شێخ قادر، وتەبێژی بەنزینخانەکانی سلێمانی بۆ میدیاکان ڕایگەیاند، لیترێک بەنزینی نۆرماڵ لە 850 دینارەوە بووە بە 875 دینار واتە 25 دینارى چۆتە سەر. لەبارەی هۆکاری بەرزبوونەوەی نرخەکەش بەهمەن شێخ قادر وتى "بەنزین لە ئێران و عێراقەوە کەمتر هاوردە دەکرێت و لەنێوخۆشدا خواستی زۆر لەسەرە. بەنزینی حکومیی 750 دیناریش بۆ سلێمانی نایەت. ئەوانە هەموویان هۆکارن." هاوکات جارێكی دیكە لە شاری هەولێریش شۆفێران بۆ وەرگرتنی بەنزین لە بەنزینخانەكان سەرەگرتنیان دەستپێكردەوە. پەیامنێرمان رایگەیاند ، بەهۆی بەرزبوونەوەی نرخی بەنزینی نۆرماڵ و كەمی دابەشكردنی بەنزینی (750) دیناریی، جارێكی دیكە شۆفێران نۆرە گرتنیان دەستپێكردەوە. لە هەرێمی کوردستان جگە لە بەنزینی نۆرماڵ، بەنزینی موحەسەن و سوپەریش هەیە کە لیتری لە 900 بۆ 1300 دینارە، لە کاتێکدا لە ژێر دەسەڵاتى حکومەتى عێراق بەنزینى نۆڕمەڵ بە نرخى پاڵپشتیکراو دابەشدەکرێت لە بەنزینخانەکان کە هەر لیترێکى بە 450 دینارە و جۆرى سوپەریش لیترى بە 800 دینارە.