بوار، تایبەت وەزیری ئاوەدانكردنەوەی حكومەتی هەرێم ئاماژە بەوەدەكات تا ئازادی ڕۆژنامەوانی فراوانتر بێت، ئەوە بە دڵنیایەوە دەسەڵاتێكی دیموكراتتر و خزمەتگوزار دەبێت، لە هەر كوێیەك ئازادی ڕۆژنامەوانی بەرتەسككرایەوە ئەوا گەندەڵی زیاد دەكات، بۆیە دەبێت هەموان هەوڵی فراوانكردنی ئازادی ڕۆژنامەوانی بدەین. دانا عەبدولكەریم، وەزیری ئاوەدانكردنەوەی حكومەتی هەرێم ڕاگەیاند: پێویستە یاسای پێدانی زانیاری كارابكرێت و ئەوانیش لە وەزارەتی ئاوەدانكردنەوە هەموو هەنگاوەكانیان بەو ئاڕاستەیە كە هەمیشە دەرگایان بە ڕووی ڕۆژنامەنوساندا كراوەبێت و هەر زانیارییەكیان بوێت پێیانبدەن، چونكە تا ئازادی ڕۆژنامەوانی زیاتر بێت، شەفافییەت زیاتر دەبێت و گەندەڵی كەمتر دەبێتەوە. ئاماژەی بەوەشكردووە، تا ئازادی ڕۆژنامەوانی زیاتر بێت دەسەڵات زیاتر هەست بە بەرپرسیارێتی دەكات، بە پێچەوانەشەوە لە هەر كوێییەك ڕێگری لە ئازادی ڕۆژنامەوانی كرا، ئەوا گەندەڵی و ناشەفافی زیاد دەكات، بۆیە پێویستە هەمیشە یاسای مۆدێرن بۆ كاری ڕۆژنامەوانی و ئێستاش بۆ سۆشیال میدیا هەبێت، تا بتوانرێت لێیەوە ڕەخنەی بنیادنەرانە لە دامەزراوەكان بگیرێت. وەزیری ئاوەدانكردنەوە ئەوەشی وتووە كە پێویستە میدیاش بەرپرسانەتر مامەڵە بكات و زیاد لە جارێك بە زانیارییەكانیدا بچێتەوە و مامەڵەی ڕۆژنامەوانی لەگەڵ دۆسییەكان بكات.