#بوار
 بەپێی بەدواداچونەکانی بوار ئەو دوو لیستەی لەسۆشیال میدیا بڵاو کراوەتەوە کە تێیدا جێگۆڕکی بە چەند کاندیدێکی لایەنە براوەکانی پارێزگای هەولێر و سلێمانی کراوە دوورە لە ڕاستیەوە و کۆمسیۆن بڵاوی نەکردووەتەوە و بڵاوکردنەوەی لیستی هاوشێوە بریتیە لە ڕاگەیاندنی ئەنجامی کۆتایی کە تا ئێستا ڕانەگەیەندراوە.
جگە لەوەی دوو لیستەکە سەرچاوەکەی کۆمسیۆن نیە لەهەمان کاتدا پێچەوانەی ئەو سیستەمەیە کە کۆمسیۆن کورسی ئافرەتانی لە پارێزگاکان پێ دیاری دەکات.
بەپێی سیستەمەکەی کۆمسیۆن کۆتای ژنان لە کورسی کۆتای پێکهاتەکان دیاری ناکرێت و ۳۰ کورسی لە ۹٥ کورسی دەنگدانی گشتی بۆ ژنان دەبێت.
لەپارێزگای سلێمانی ۳٦ کورسی دەنگدانی گشتی هەیە دەبێت ۱۱ کورسی بۆ ژنان بێت و لە پارێزگای هەولێر لە ۳۲ کورسی ۱۰ کورسی بۆ ژنانەو لە پارێزگای دهۆک لە ۲٤ کورسی ٨ کورسی بۆ ژنانە و لەپارێزگای هەڵەبجە لەکۆی سێ کورسی کورسیەک تایبەتە بەژنان.
بەپێی ڕێنمایەکانی کۆمسیۆن دەنگی لیست و کاندیدە سەربەخۆکان جگە لە دەنگی کۆتای پێکهاتەکان لە هەربازنەیەک لە زۆرترینەوە بۆ کەمترین ڕیز دەکرێن ودواتر کۆی دەنگە دروستەکانی ئەو پارێزگایە دابەشی ژمارەی کورسی دەنگدانی گشتی پارێزگاکە دەکرێت تا بەهای کورسیەک بزانرێت و پاشان دەنگی هەر لیستێک دابەشی بەهای کورسی دەکرێت و ژمارەی کورسیەکانی لیستەکان دیاری دەکرێت.
لەکاتی مانەوەی کورسیەک یان زیاتر بەبەتاڵی ئەوا زۆرترین ماوە (باقی ئەقوا) دەبێتە خاوەنی کورسی یەکەم و پاشان زۆرترین ماوەی دووەم دەبێتە خاوەنی کورسی دووەم تا دواتر.
لەناو کاندیدەکانی هەر لیستێک دەنگی کاندیدەکان لە زۆرترینەوە تا کەمترین ڕیز دەکرێت لەسێ کەس ژنێک هەڵدەبژێردرێت بەپێی زۆرترین دەنگی لە لیستەکە.
ئەگەر کۆتای ژنان بەو شێوەیە تەواو نەکرا ئەوا لەو لیستانەی دوو کورسیان هەیە کورسی دووەم بۆ ژنان دەبێت و ئەگەر بەو شێوازەش تەواو نەبوو ئەو لیستانەی یەک کورسیان هەیە کۆتای ژن هەڵدەبژێردرێت بەجۆرێک ئەو لیستانەی دوو کورسی یان یەک کورسیان هەیە لەو لیستانەوە دەست بە دانانی کۆتا دەکرێت کە کەمترین دەنگیان هێناوە بۆ نمونە ئەگەر لیستی Aبە ۳۰ هەزار دەنگ دوو کورسی هێناو لیستی B بە ۲٥ هەزار دەنگ دوو کورسی هێنا ئەوا کۆتای ژنان سەرەتا لە لیستی دووەم دیاری دەکرێت.
کورسی کۆتای مەسیحی و تورکمان سیستەمی کۆتای ژنانی بەسەردا پیادە ناکرێت و چەند کاندید لە پارێزگایەک بۆ کورسی کۆتا ڕکابەر بوون ئەوا دەنگی یەکەم هەڵدەبژێردرێت.
لەحاڵەتی یەکسان بوونی دەنگی دوو لیست یان دوو کاندیدی ناو لیستێک لەسەر کورسیەک ئەوا کۆمسیۆن بە ئامادەبوونی هەردولا بە سیستەمی تیروپشک یەکلای دەکاتەوە.