ئەندامێكی لیژنەی دارایی لە پەرلەمانی عێراق ئاشكرایكرد كە لە دانیشتنی ئەمڕۆی لیژنەی دارایی هەمواری پرۆژەیاسای بودجەی گشتی پەسەندكرا كە بەگوێرەی هەموارەكە بڕی 16 دۆلار دانراوە بۆ تێچووی بەرهەمهێنانی نەوت. د. نەرمین مەعروف، ئەندامی لیژنەی دارایی لە پەرلەمانی عێراق بە بواری ڕاگەیاند: لەكۆبوونەوەی ئەمڕۆی لیژنەی دارایی دەنگماندا بە پرۆژە یاسای هەمواری یاسای بودجە ( مادەی دوانزە/ دووەم/ ج) تایبەت بە هەناردەكردنەوەی نەوتی هەرێم و چاوەڕواندەكرێت لە دانیشتنی ئەمڕۆی ئەنجومەنی نوێنەرانیش دەنگی لەسەر بدرێت. ئاماژەی بەوەشكرد، ئەو هەموارە بەمەبەستی دەستكردنەوە بە هەناردەكردنی نەوتی هەرێم دەنگی لەسەركراوە، بەجۆرێك بەپێی هەموارەكە بڕی 16 دۆلار بۆ هەر بەرمیلێك نەوت وەك سلفە دەدرێتە هەرێم بۆ تێچووی بەرهەمهێنان و گواستنەوە تا ئەو كاتەی كۆمپانیایەكی پسپۆر (كە لەماوەی ٦٠ رۆژ دەستنیشاندەكرێت بە رێكەوتنی نێوان هەرێم و بەغدا) خەملاندنێكی دادپەروەرانە دەكرێت بۆ تێچووی كێڵگە نەوتییەكانی هەرێم. ئەو ئەندامەی لیژنەی دارایی لە پەرلەمانی عێراق ئەوەشی خستەڕوو، بەپێی یاسای بودجەی فیدڕاڵی هەرێم دەبێت رۆژانە 400 هەزار بەرمیل نەوت لەرێگەی كۆمپانیای سۆمۆ هەناردە بكات یان لەرێگەی وەزارەتی نەوتی فیدڕاڵ بۆ پێداویستی ناوخۆ بەكاریبێنێت