یاسای دەزگای هەواڵگری نشتیمانی عێراق، ئەمڕۆ  ۱۹ی ۱، لە پەرلەمانی عێراق دەنگی لەسەر درا، وەک یاسایەکی فیدڕاڵی. دوای واژۆی سەرۆک کۆمار و بڵاوکردنەوەی لە ڕۆژنامەی وەقائیعی عێراق دەچێتە بواری جێبەجێکردنەوە.  یاساکە پاڵپشت بەو بەند و ماددانەی دەستوری عێراق نوسراوە کە فیدڕاڵین و دەزگاکە بە فیدڕاڵی پێناسە کراوەو دەسەڵاتێکی زۆری دەبێت و مادەکانی یاسای ئاسایشی نشتیمانی هێندە لاستیکی داڕێژراون سنورێک بۆ دەسەڵاتی دەزگاکە نامێنێت و دەتوانێت لە زۆر بواردا دەستوەردان بکات. لە مادەی شەشەمی یاسای دەزگای هەواڵگری نشتیمانی عێراق بە چەندین  بڕگە باسی دەسەڵات و ئامانجی دەزگاکە دەکات و دەسەڵاتی ئەوەی پێبەخشیوە هەر کارێک لەسەرتاسەری عێراق زیانی بۆ ئاسایشی نشتیمانی عێراق هەبێت دەزگاکە ڕێگری لێبکات بەتایبەت لە بواری ئابوری و سیاسی و هەواڵگری. لەماددەی ۹ی یاساکەدا پێکهاتەی دەزگاکە دیاری دەکات و مافی ئەوەی پێداوە لە هەموو پارێزگاکانی عێراق فەرمانگەیەک بکاتەوە بەناوی فەرمانگەی ئاسایش. بەجۆرێک لە ڕەشنوسی یاساکە  دەستەواژەی هەموو پارێزگاکان جێگیرکراوەو لە لێژنەی ئاسایش و بەرگری پەرلەمانی عێراق پەرلەمانتارانی شیعە زۆر جەختیان لەو دەستەواژەیە کردەوەوە ڕازی نەبوون ووشەی جگە لە هەرێم لە پاڵ پارێزگاکان زیاد بکرێت. بەو پێیە دەزگاکە دەتوانێ فەرمانگەی تایبەت بەخۆی لە پارێزگاکانی هەرێم بکاتەوە و بەپێی یاسا ناتوانرێت ڕێگری لێبکرێت. جگە لەوەش لە هیچ ماددەو بڕگەیەکی یاساکە ئاماژە بەدەزگا ئەمنی و ئاسایشییەکانی هەرێم نەکراوە تا بزانرێت چۆن مامەڵەیان لەگەڵدا دەکرێت. بەگشتی یاسای دەزگاکە وا داڕێژراوە لە هەرێم هاوشێوەی پارێزگاکانی تری عێراق کار بکات. پێشر لەو یاسایانەی هاوشێوە بوون تایبەتمەندی هەرێم لەبەرچاو دەگیراو دەستەواژەی (ماعدا إقليم كردستان) يان (محافظات غير منتظمة في أقاليم) بەکار دەهێنرا. بەڵام لەم یاسایە بە دەق هاتووە بەڕێوەبەرایەتی ئاسایشی نشتیمانی لەهەموو پارێزگاکان بکرێتەوە. سەرەڕای ئەوەی چەندین مانگە یاساکە لە لیژنەکانی ئاسایش و بەرگری و یاسایی پەرلەمانی عێراق بووە. بەڵام ئەندامانی کورد یاساکەیان بەهەند وەرنەگرتووە و تەنانەت پێشنیاری ئەوەیان نەکردووە جێگای ئەنجومەنی ئاسایشی هەرێم یان دەزگا هاوتاکانی هەرێم لەیاساکە جێ بکەنەوە. بەغدا دەیەوێت لە ڕێگای یاساکەوە دۆسیەی ئاسایش و هەواڵگری لەدەستی هەرێم دەربهێنێت. لانیکەم وەک بەڕێوەبەرایەتی و پارێزگایەک مامەڵە لەگەڵ دەزگاکانی هەرێم بکات. کردنەوەی بارەگای دەزگای هەواڵگری و ئاسایشی سەر بە حکومەتی ناوەند لە هەرێم جگە لەوەی هەرێم بچوک دەکاتەوە هەژمونی زیاتری بەغدا بەسەر هەرێمدا دەسەپێنێت و بەلانی کەمەوە بەغدا ئەگەر لە داهاتودا  تەواوی دۆسیەی هەواڵگری و ئاسایشی لەلانەبێت ئەوا دەبێتە هاوبەش.  لە داهاتوو ئەو یاسایە دەبێتە کارتێکی بەهێزی بەغدا دژی هەرێم و گرفتی نوێ لەسەر دۆسیەی ئاسایش لەنێوان بەغداو هەرێم سەرهەڵدەدات بەتایبەت لە هەرێم بەپێی یاسایەک ئەنجومەنی ئاسایش و دەزگای ئاسایش و هەواڵگری هەن و لە یاساکەی عێراق جێگەیان نەکراوەتەوە.  یاساکە دەستی بەغدای واڵا کردووە چوار بەڕێوەبەرایەتی لە شارەکانی هەولێر و سلێمانی و دهۆک و هەڵەبجە بکاتەوە کە کاریان هەواڵگری و کۆکردنەوەی زانیاری و ئەنجامدانی ئۆپراسیۆنی هەواڵگری و سەربازی دەبێت. سەرۆکی دەزگای ئاسایشی نشتیمانی عێراق پلەی وەزیری هەیە و دەبێتە دەزگایەک هاوشێوەی وەزارەتەکانی بەرگری و ناوخۆ سیادی دەبێت و یاسای دەزگاکە ئەوەندە لاستیکیە دەتوانرێ بۆ مەرامی سیاسی بەکار بهێنرێت بەتایبەت بەدەق دیاری کردووە هەرپڕۆسەیەک لەسەرتاسەری عێراق زیان لە ئابوری گستی عێراق بدات دەزگاکە دەبێت ڕایبگرێت و بەو پێیە دەتوانێ بەناوی ئاسایشی ئابوریەوە  دەستوەردان لە کێڵگەکانی نەوت و دەروازەکان بکات. دەزگای میدیای بوار بەر لە هەشت مانگ لە ڕاپۆرتێکدا مەترسی تێپەڕاندنی یاساکەی لەسەر هەرێم خستەڕوو.