#بوار لەسەردانی محەمەد سیاع سودانی بۆ بەریتانیا گرێبەستێک لەگەڵ کۆمپانیای بریتش پترۆلیۆم BP و حکومەتی عێراق واژۆ کرا بۆ پەرەپێدانی کێڵگە نەوتیەکانی کەرکوک. بەپێی گرێبەستەکە کۆمپانیای BP کێڵگەکانی کەرکوک پەرە پێدەدات کە پێکهاتوون لە زنجیرەیەک کێڵگە. کە هەر یەک لە باباگوڕگوڕ و خەباز و زەمبور و هاڤانا و بای حەسەن دەگرنەوە. کاری کۆمپانیای BP بریتی دەبێت لە بەرزکردنەوەی ئاستی بەرهەم هێنانی نەوت لە ۳۰۰ هەزار بەرمیل نەوتەوە بۆ نزیکەی ملیۆنێک بەرمیل نەوت لە ڕۆژێکدا. بۆ ئەم مەبەستەش کۆمپانیا بەریتانییەکە چەندین بیری نوێ لێدەدات. لەگەڵ دەرهێنانی نەوت لە کێڵگەکانی کەرکوک غاز دەردەهێنرێت و هاوشان لەگەڵ نەوت بەرهەمی غازی دەرهێنراو زیاد دەکرێت. بڕیارە لە داهاتوودا هەر سێ پاڵاوگەی بێجی و کەربەلا و نەجەف پشت بە نەوتی کەرکوک ببەستن و لە ڕێگای بۆڕیەوە دەبەسترێنەوە بە کەرکوک. بڕیارە نزیکەی ٤۰۰ تا ٥٥۰ هەزار بەرمیل نەوت لەڕۆژێکدا دەدرێتە ئەو سێ پاڵاوگەیە. ئەو نەوتەی دەمێنێتەوە لە ڕێگای بۆڕی «کەرکوکـ جەیهان» ڕەوانەی دەرەوە دەکرێت کە ساڵی ڕابردوو بۆڕییەکە نۆژەن کرایەوە. بەپێی گرێبەستەکە زنجیرە کێڵگەی کەرکوک دەگرێتەوە کە خوڕمەڵە بەشێکە لە زنجیرەکە تا سنوری سەرگەڕان تەنانەت ناوچەکانی دیبەگەو قەراجیش دەگرێتەوەو لە ئایندەدا گرفت لەسەر خوڕمەڵە دروست دەبێت. بەو پێیەی لە بنەڕەتدا خوڕمەڵە و هاڤانا و بای حەسەن و باباگوڕ گوڕ یەک کێڵگەن لە ژێر زەویدا. کۆمپانیای نەوتی باکور وەک لایەنی حکومی سەرپەرشتی کێڵگەکان دەکات لەگەڵ کۆمپانیای BP و کۆمپانیاکە کێڵگەکانی خوڕمەڵە و کۆرمۆر بەسنوری کارکردنی خۆی دەزانێت و داوای دەکاتەوە ڕەنگە بیەوێت لەڕێگای کۆمپانیای BP وەری بگرێتەوە. هەندێ زانیاری نافەڕمی هەن لەسەر گرێبەستەکەی BP باس لەوە دەکەن کۆمپانیاکە لە ناوچەکانی قەرەهەنجیر و قەرەحەسەن و سەرگەڕان و ناوچەی نێوان قادرکەرەم و کەرکوک بەدوای نەوتدا بگەڕێت و نەوت دەربهێنێت و هەردوو کێڵگەی غازی چەمچەماڵ و کۆرمۆر و کێڵگەکانی کەرکوک بەبۆڕی ببەسترێنە بەغدا. تا بتوانرێ غازی ئەو کێڵگانە ڕەوانەی بەغدا بکرێت. لە ماوەی ڕابردوو کۆمپانیا بەریتانیەکە پێش ئەنجامدانی گرێبەست دووجار سەردانی کەرکوکی کردووەو بڕیارە لە مانگی نیسانی ئەمساڵ دەست بەکار بکات و کێڵگەکانی کەرکوکی ڕادەست بکرێت.