تادێت ناكۆكیەكانی هەردوو باڵی سەركردایەتی و باڵی دەرەوەی سەركردایەتی بەرەی توركمانی زیاتر پەرەدەسێنێت و لە ئێستادا ناكۆمی ئەو دوو باڵەی بەرەی توركمانی گەیشتووەتە ئاستێك كە لەجەژندا هەردوو باڵی بەرەكە بەجیا لە ڕۆژانی جەژن لەدوو هۆڵی جیاواز كۆبونەوەی فراوانی لایەنگرانی خۆیان بەبۆنەی جەژنی ڕەمەزان ڕێكخست. بەگوێرەی زانیاریەكانی بوار، باڵی دەرەوەی سەركردایەتی بەرەی توركمانی كە (ئەرشەد ساڵحی) سەرۆكایەتی دەكات و (یاوز حەمید) جێگری پارێزگاری كەركوك وەك یەكێك لە سەركردەكانی باڵی ئەرشەد ساڵحی دەركەوت و هاوشانی ئەرشەد ساڵحی پێشوازی لە لایەنگران و هاوڵاتیانی توركمان دەكرد لە ڕۆژانی جەژنی ڕەمەزاندا. ئاماژە بەوەشكراوە، دكتۆر (یاوز حەمید) دوای دەست نیشانكردنی وەك جێگری پارێزگاری كەركوك لەلایەن باڵی سەركردایەتی بەرەی توركمانی بڕیاری دوورخستنەوەی لە حیزب درا و ناوبراو لە كۆبونەوەی فراوانی جەژن بەفەڕمی لەگەڵ باڵی ئەرشەد ساڵحی دەركەوت و ئێستا وەك یەكێك لەسەركردەكانی باڵی دەرەوەی سەركردایەتی بەرە دەناسرێت. دەركەوتنی ئاشكرای یاوز حەمید لەگەڵ لایەنگرانی ئەرشەد ساڵحی ڕاگەیاندنی فەڕمی بەشداری باڵی دەرەوەی سەركردایەتی بەرەیە لە ئیدارەی كەركوك، هاوكات بڵاو بوونەوەی وێنەیەكی (ئەرشەد ساڵحی) لە كۆبونەوەی جەژن لە نێوان (یاوز حەمید و ئەحمەد ڕەمزی) ئەندامی ئەنجومەنی پارێزگای كەركوك زۆرترین كاردانەوەی لێكەوتەوە بەجۆرێك وەك سێ نوێنەری توركمانی كەركوك ناودەبرێن كە نوێنەرایەتی توركمان لە پەرلەمانی عێراق و ئەنجومەنی پارێزگای كەركوك و ئیدارەی كەركوك دەكەن.