بڕیارە ڕۆژی شەممە ٥ی نیسان بارەگای ئەنجومەنی سەرکردایەتی کەرکوک گەرمیانی پارتی لە کەرکوک بکرێتەوەو پارتی بەفەڕمی دوای حەوت ساڵ و نیو لە ڕووداوەکانی ئۆکتۆبەری ۲۰۱۷ لە ئاستی سیاسی باڵا بگەڕێتەوە کەرکوک. بارەگای نوێی ئەنجومەنی سەرکردایەتی پارتی لەکەرکوک لەگەڕەکی عەرەفە دەبێت و ئەنجومەنەکە سەرپەرشتی پێنج لقی پارتی دەکات کە بریتین لە لەکانی کەرکوک و چەمچەماڵ و دەوروبەری کەرکوک و گەرمیان و خانەقین . پێش ڕووداوەکانی ئۆکتۆبەری ۲۰۱۷ ئەنجومەنی سەرکردایەتی پارتی لەکەرکوک لە بینایەکدا بوو لە سەر ڕێگای هەولێر لەگەڕەکی شۆراو و دوای ڕووداوەکانی ئۆکتۆبەری ۲۰۱۷ بیناکە کرا بە فەرماندەی ئۆپراسیۆنە هاوبەشەکانی سوپای عێراق و لە ڕێکەوتنی گەڕانەوەی پارتی بۆ کەرکوک و پڕۆسەی چۆڵکردنی بیناکە لە مانگی ئەیلولی ۲۰۲۳ خۆپیشاندانی جیاواز لەلایەن کورد و بەشێک لە لایەنگرانی حزبە عەرەبیەکان ڕوویدا و لەئەنجامدا چوار خوپیشاندەری کورد بە گولەی هێزە عێراقیەکان کوژران و کردنەوەی بارەگای ئەنجومەنی سەرکردایەتی پارتی لەکەرکوک دواکەوت و لایەنە عەرەبیەکان بۆ ڕێگری لە ڕادەستکردنی بارەگاکە لەدادگای فیدڕاڵی سکاڵایان تۆمار کرد و بەبڕیاری سەرۆکی پارتی بینای ئەنجومەن پێشکەشی زانکۆی کەرکوک کرا .