یەکێتی نشتیمانی کوردستان، بەرپرسانی حکومی ئاگادار کردوەتەوە کە دژایەتی پڕۆژەی ڕوناکی نەکەن بۆ دابین کردنی کارەبای ۲٤ کاتژمێری. هەر بەرپرسێک کێشە بۆ پڕۆژەکە دروست بکات سزا دەدرێت. بەپێی زانیاریەکانی بوار، یەکێتی نایەوێت لە سنوری پارێزگای سلێمانی و هەڵەبجە کێشە بۆ پڕۆژەی ڕوناکی دروست بکرێت و ڕێگری لێ بکرێت و هاوشێوەی هەژماری من جێبەجێ کردنی دوا بکەوێت. بەهۆی ڕێگری و هەماهەنگی نەکردن لە جێبەجێ کردنی پڕۆژەکە ئاگادار کردنەوەو سەرنج ڕاکێشان (تەوبیخ) بۆ بەرپرسێکی باڵای پارێزگای هەڵەبجە دەرچووە. دوای سەرنج ڕاکێشانی ئەو بەرپرسە سەرۆکی یەکە ئیدارییەکانی سلێمانی و هەڵەبجە ئاگادارکراونەتەوە ڕێگری بۆ پڕۆژەکە نەکرێت. زۆرترین هەماهەنگی بکرێت و بەماوەیەکی کەم هەموو پارێزگای هەڵەبجە خرایە ناو سیستەمەکەوە. پڕۆژەی ڕوناکی کە کارەبای بەردەوامی ٢٤ کاتژمێرییە تەواوی پارێزگای هەڵەبجەو سەنتەری شاری سلێمانی و قەزای قەرەداغ و دەوروبەری سلێمانی گرتوەتەوەو نزیکەی یەک ملیۆن و ٤۰۰ هەزار کەس لە هەردوو پارێزگای هەڵەبجەو سلێمانی کارەبایان بووەتە ۲٤ کاتژمێری.