دو رۆژە خانەقینییەکان خۆپیشاندان ئەنجام دەدەن و دەروازەی مونزیرییەیان داخستوە
بوار نیوز، خانەقین
لەبەرامبەر کەمی کارەباو نەبوونی خزمەتگوزاری و گەندەڵی ئیداری و فرۆشتنی زەوی شارۆچکەکە، دانیشتوانی خانەقین، لەشەقامن و داوا دەکەن کۆتایی بەکێشەکانی خانەقین بهێنرێت.
دوو ڕۆژە دانیشتوانی شارۆچکەی خانەقینی سەر بەپارێزگای دیالە، دەستیان بەخۆپیشاندان و ناڕەزایەتی دەربڕین کردووەو داوا دەکەن بەزوویی کێشەی کەمی کارەبا چارەسەر بکرێت و ڕەخنەش لەوەدەگرن کەس بەدەمیانەوە نایەت.
ئێوارەی دوێنێ خۆپیشاندان لەسەر ڕێگای سەرەکی مەرزی مونزرییەی نێودەوڵەتی لەشارۆچکەی خانەقین کە وڵاتی عێراق و ئێران پێکەوە دەبەستێتەوە، دەستی پێکردو ڕێگای سەرەکی دەروازەکەیان داخست و دەیان دروشمیان بەرزکردەوەو لەدروشمەکانیاندا داوای دابینکردنی خزمەتگوزارییە سەرەتاییەکانیان دەکرد.
بەیانی ئەمڕۆش جارێکی تر خۆپیشاندان و ناڕەزایەتی دەربڕین دەستی پێکردەوەو تا ئێستاش بەردەوامەو لەبەرامبەر بینایی قایمقام چادر هەڵدراوەو ڕێگای نێوان (بەغداـ خانەقین)، لەهەردوو گەڕەکی سەبعە نیسان و بەختیار داخراون.
ئەمیر عەلی، یەکێک لەسەرپەرشتیارانی خۆپیشاندانەکانی خانەقین، بەبوار نیوزی وت: بۆ داواکردنی مافەکانی خۆمان، کە مافی زۆر سەرەتایین و پەیوەستن بەژیانی خەڵکەوە، دوو ڕۆژە لەشەقامین و تائێستا هیچ کەسێک لەلایەن ئیدارەی شارۆچکەکەوە، بەدەممانەوە نەهاتووە، ئێمەش بەردەوام دەبین، تا وەڵاممان دەدرێتەوەو گوێمان لێدەگرن.
عەباس خانەقینی، یەکێکی دیکەیە لەخۆپیشاندەرەکان و لەبارەی داواکارییەکانیان بەبوار نیوزی وت: لەخانەقین تا ئێستا ڕەگەزنامەیەک دەربکەی دەبێت پارە بدەی، ئاو بۆ ماڵەوە ڕابکێشیت دەبێت پارە بدەیت، لەکاتێکدا فەرمانگەکان موڵکی حکومەتن و دەبێت بەخۆڕایی خزمەت بەخەڵک بکات، زەوی لەخانەقین نەما هەمووی فرۆشرا بەخەڵکی دەرەوەی خانەقین و هەمووی کرا بە ڤێلاو باخ و پارەکشی چووە گیرفانی بەرپرسانی یەکێتی و حەشدی شەعبیەوە.
لەسەر پرسی کەمی کارەباو گلەیی هاوڵاتیانی خانەقین، تەحسین شەهاب، بەرپرسی فەرمانگەی کارەبای خانەقین، بەبوارنیوزی راگەیاند "کارەبای پارێزگای دیالە لەئێرانەوە بڕاوەو تا ئێستا هۆکارەکەی نازانین و داوامانکردووە لەکارەبای بەغدا بەزووی کێشەی خانەقین چارەسەربکەن، بەڵام تا ئێستا دەنگیان نیە".
وتیشی: ئێستادا ڕۆژانە ۱۰ بۆ ۱۲ کاتژمێر کارەبا بە خانەقین دەدەین بەهاوڵاتیان.
بوار نیوز، بۆ زیاتر لەچەند جارێک پەیوەندی کرد بەدلێر سایە، قائیمقامی شارۆچکەی خانەقین، بەڵام هیچ وەڵامێکی دەست نەکەوت.